މާލޭގެ އިތުރުން މާފުއްޓާއި، ކުޑަހުވަދޫން އޮމިކްރޮން ފެނިއްޖެ
މާލޭގެ އިތުރުން މާފުއްޓާއި، ކުޑަހުވަދޫން ކޮވިޑް-19 އޮމިކްރޮން ވޭރިއަންޓް ފެނިފައިވާ ކަމަށް އެޗްޕީއޭ އިން ވިދާޅުވެއްޖެއެވެ.
މިހާރު ކުރިއަށްދާ ނޫސްވެރިންގެ ބައްދަލުވުމެއްގައި ހެލްތު މިނިސްޓްރީގެ ސްޓޭޓް މިނިސްޓަރ ޑރ.ޝާހް މާހިރު ވިދާޅުވީ މިހާރު ކޮވިޑް-19 އިތުރުވަމުން އަންނަނީ އޮމިކްރޮންގެ ސަބަބުން ކަމަށެވެ.
މިހާތަނަށް ރާއްޖެ އިން 19 ފަތުރުވެރިޔަކު ވެސް އޮމިކްރޮން އަށް ފައްސިވެފައިވާ ކަމަށް ޑރ.ޝާހް ވިދާޅުވިއެވެ.
މިހާތަނަށް އަށް ދިވެއްސަކު އޮމިކްރޮން އަށް ވަނީ ފައްސިވެފައެވެ.
އޮމިކްރޮން އަށް މީހުން ފައްސިވެފައި ވަނީ ވަކިތަރުތީބެއް ނެތި ނެގި ސުންކުތަކުންނެވެ. ކޮވިޑަށް ފައްސިވާ އެންމެން އޮމިކްރޮން އަށް ރާއްޖޭގައި ޓެސްޓެއް ނުކުރެއެވެ.
އޮމިކްރޮން ރާއްޖެއިން އެންމެ ފުރަތަމަ ފެނުނީ މިދިޔަ ނޮވެމްބަރު މަހު ރާއްޖެ އަށް އައި ފަތުރުވެރިއެއްގެ ގައިންނެވެ. އެ ފަތުރުވެރިޔަކީ އެ ވޭރިއަންޓު އެންމެ ފުރަތަމަ ފެނުނު ކަމަށް ބެލެވޭ ސައުތު އެފްރިކާ އަށް ދަތުރު ކޮށްފައިވާ މީހެއް ކަމަށް އޭރު އެޗްޕީއޭ އިން ބުންޏެވެ.
ރާއްޖެއިން މިހާރު އަނެއްކާވެސް ކޮވިޑް19 އަށް ޕޮޒިޓިވްވާ މީހުންގެ އަދަދު އަންނަނީ ދުވަހެއް ދުވަހަކަށް އިތުރުވަމުންނެވެ. އެގޮތުން އިއްޔެ އަކީ މިފަހުން ރާއްޖެ އިން އެންމެ ގިނަ އަދަދަކަށް ކޮވިޑް19 އަށް މީހުން ޕޮޒިޓިވްވި ދުވަހެވެ. އިއްޔެ އެ ބައްޔަށް 454 މީހުން ވަނީ ރާއްޖެއިން ޕޮޒިޓިވްވެފައެވެ.
އިއްޔެ ޕޮޒިޓިވްވި މީހުންނާއެކު ރާއްޖޭގެ އެކްޓިވް ކޭސްތަކުގެ އަދަދު ވަނީ 3،825 އަށް އަރައިފައެވެ.
