ކޮވިޑް-19 އަށް ފައްސިވާ މީހުން ބަލީގެ އެއްވެސް އަލާމާތެއް ނެތްނަމަ، އެމީހަކު ކޮވިޑް-19 އަށް ފައްސިވި ސުންކު (ޕޮޒިޓިވްވި ސާމްޕަލް) ނަގާ ތާރީޚުން ފެށިގެން ހަތް ދުވަހަށް ކަރަންޓީން ކުރާ ގޮތައް އުސޫލު ބަދަލުކޮށްފިއެވެ.
އެޗްޕީއޭ އިން ދެންމެ އިއުލާން ކުރި އުސޫލު ބުނާ ގޮތުން މި ހަތް ދުވަހުގެ މުއްދަތު ހަމަވުމުން އެމީހަކު އެކަހެރިކުރެވިފައިވާ މުއްދަތު ނިމޭނެއެވެ. ނަމަވެސް ބަލީގެ އަލާމާތެއް ހުރިނަމަ، އެކަހެރިކުރާ މުއްދަތު ނިމޭނީ އެއްވެސް އަލާމާތެއް ނެތި މަދުވެގެން 24 ގަޑިއިރު ވުމުން ކަމަށް އުސޫލުގައި ބުނެފައި ވެއެވެ.
މިގޮތައް އުސޫލު ބަދަލުކުރި ނަމަވެސް ސުންކު ނަގާ ތާރީޚުން ފެށިގެން ހަތް ދުވަސް ފުރިހަމަވުމާއެކު މަސައްކަތަށް ނުކުންނަންޖެހޭ ޞިއްޙީ ޚިދުމަތްދޭ ތަންތަނާއި، މީހުން ބަލަހައްޓާ މަރުކަޒުތަކާއި ސްކޫލުތަކާއި ކިޔަވައިދޭ މަރުކަޒުތައްފަދަ ތަންތަނުގައި މަސައްކަތްކުރާ މުވައްޒަފުން ވަޒީފާއަށް ނުކުންނަންވާނީ އެންޓިޖެން ޓެސްޓު ހަދައި ނަތީޖާ ނައްސިވުމުން ކަމަށް އުސޫލުގައި ވަނީ ބުނެފައެވެ. އެންޓިޖެން ޓެސްޓު ހަދާނީ މިނިސްޓްރީ އޮފް ހެލްތުން ކަނޑައަޅާފައިވާ ގައިޑްލައިނާ އެއްގޮތްވާގޮތުގެ މަތިން މިނިސްޓްރީ އޮފް ހެލްތުން އެންޓިޖެން ޓެސްޓު ހެދުމުގެ ހުއްދަ ދީފައިވާ ތަނަކުންނެވެ.
އާދީއްތަ ދުވަހު އިއުލާން ކޮށްފައިވާ ގޮތައް މިއަދު އާއްމުކުރި އުސޫލުގައި ވެސް ބުނެފައި ވަނީ ކޮޮވިޑް-19 ވެކްސިންގެ ޑޯޒްތައް ފުރިހަމަ ވެފައިވާ ކޮވިޑް-19 އަށް ފައްސިވާމީހުންގެ ކޮންޓެކްޓުން ނުވަތަ ގާތުން އެއްތާވި މީހން ކަރަންޓީނު ކުރެވޭނީ ފައްސިވި މީހާއާ ކޮންޓެކްޓުވި ތާރީޚުން ފެށިގެން ދިހަ ދުވަހުގެ މުއްދަތަކަށް ކަމަށެވެ. މި 10 ދުވަސް ފުރިހަމަވުމުން، ބަލީގެ އަލާމާތެއް ނެތްނަމަ އިތުރު ޓެސްޓުކުރުމަކާނުލައި ކަރަންޓީނުން ދޫކުރެވޭނެއެވެ.
އަދި އެ މީހަކު ކަރަންޓީނުވުމަށް ހެލްތު ޕްރޮޓެކްޝަންއެޖެންސީން އަންގާ ތާރީޚުން ފެށިގެން ފަސް ދުވަސް ފުރިހަމަވުމުން، ޕީ.ސީ.އާރ ޓެސްޓު ހަދައި ނަތީޖާ ނައްސިވުމުން ކަރަންޓީނުން ދޫކުރެވޭނެ ކަމަށް ވެސް އުސޫލުގައި ބުނެފައި ވެއެވެ. ނަމަވެސް އެގޮތައް ފަސްދުވަސް ފުރިހަމަ ވުމުން ދޫކޮށްލާނީ ކޮޮވިޑު-19 އަށް ފައްސިވެފައިވާ މީހުންނާ މުޅިން ވަކިން ކަރަންޓީނުގައި ތިބޭ ނަމައެވެ.
މިއަދު ކަރަންޓީންގެ އުސޫލަށް ބަދަލުގެނައި ނަމަވެސް ކޮވިޑް-19 ވެކްސިން ފުރިހަމަނުވާ ކޮވިޑް-19 އަށް ފައްސިވާ މީހުންނާއި ގާތުން އެއްތާވި މީހުން ކަރަންޓީނު ކުރެވޭ މުއްދަތަކީ ފައްސިވި މީހާއާ ބައްދަލުވި ތާރީޚުން ފެށިގެން 14 ދުވަހެވެ. އަދި ކަރަންޓީނުން ދޫކޮށްލެވޭނީ 14 ދުވަސް ފުރިހަމަވުމުން ޕީ.ސީ.އާރ ޓެސްޓު ހަދާ ނަތީޖާ ނައްސި ވުމުންނެވެ.
މިއަދު އިއުލާން ކުރި އުސޫލުގެ މަތިން ކޮވިޑް-19 އަށް ފައްސިވާމީހުން އެކަހެރި ކުރާ މުއްދަތާއި ފައްސިވާ މީހުންނާއި ގާތުން އެއްތާވި މީހުން ކަރަންޓީނު ކުރާ މުއްދަތަށް ބަދަލު ގެނައުމުން މިހާރު އެކަހެރިކުރެވިފައިވާ އަދި ކަރަންޓީނުކުރެވިފައިވާ ފަރާތްތައް މި ނިންމުމުގައިވާ ގޮތުގެ މަތިން މުއްދަތުތައް ފުރިހަމަވެފައި އަދި ކަނޑައެޅިފައިވާގޮތުގެ މަތިން ޓެސްޓުގެ ނަތީޖާ ލިބިފައިވާނަމަ އެކަހެރިވުން ނުވަތަ ކަރަންޓީނުވުން ނިމޭނެ ކަމަށް ވެސް އެޗްޕީއޭ އިން ވިދާޅުވިއެވެ.
އެޗްޕީއޭ އިން ވިދާޅުވެފައިވާ ގޮތުގައި ކަރަންޓީން މުއްދަތަކަށް ބަދަލު ގެނައީ ދުނިޔޭގެ އެހެން ގައުމުތަކުގައި ވެސް މިހާރު އަމަލު ކުރަމުން އަންނަ އުސޫލު ބެލުމަށް ފަހުއެވެ.
