ކުޅުދުއްފުށިން އިތުރު 27 ފަރާތެއް ކޮވިޑް 19އަށް ޕޮޒިޓިވްވެ ޖުމުލަ އަދަދު 102 އަރައިފިއެވެ.
ކުޅުދުއްފުށީ ރީޖަނަލް ހޮސްޕިޓަލުން މައުލޫމާތު ދޭގޮތުގައި ފައްސިވެފައި ވަނީ ހުމާއި ރޯގާގެ އަލާމާތްތައް ފެނިގެންނާއި މާލެއަށް ދަތުރުކުރުމަށްފަހު އަދި ކުރިން ފައްސިވެފައިވާ ފަރާތްތަކުގެ ކޮންޓެކްޓުންގެ ގޮތުގައި ފާހަގަކުރެވިފައިވާ ފަރާތްތަކެވެ. އެހެން ކަމުން އިތުރު ސާމްޕަލް ނެގުމުގެ މަސައްކަތް އަދި ޓްރޭސިންގެ މަސައްކަތް ކުރިޔަށް ދާކަމަށް ކޭއާރުއެޗުން ވިދާޅުވިއެވެ.
މީގެއިތުރުން، ރޯގާގެ އަލާމާތްތައް ހުރި އެންމެހާ ބޭފުޅުން ލަސް ނުކުރައްވާ ސާމްޕަލް ނެގުމަކީ ބަލި ފެތުރުން ކޮންޓްރޯލު ކުރުމަށް އެޅިގެން ދާނެ ފިޔަވަޅެއް ކަމުގައި ކޭއާރުއެޗުން ބުނެއެވެ. ފުލޫ އޯޕީޑީއަށް ވަޑައިގެން ނުވަތަ 7606688 އަށް ގުޅާ ނުވަތަ އެސްއެމްއެސް ކުރައްވައިގެން ސާމްޕަލް ނެގުމުގެ ކަންތައްތައް ކުރިޔަށް ގެންދިޔުމަށް ކޭއާރުއެޗުން ލަފާދެއެވެ.
މި ވަގުތު އެންމެ މުހިންމު ކަމެއް ދޭންވީ ސާޖިކަލް މާސްކު އަޅައިގެން އުޅުމާއި، ގިނަގިނައިން ސައިބޯނި ލައިގެން އަތް ދޮވުމާއި، ބައްދަލު ވާ މީހުންގެ އަދަދު މަދު ކުރުން ކަމަށް ކޭއާރުއެޗުން ބުނެއެވެ.
