ރާއްޖޭން އިތުރުން 954 މީހަކު ކޮވިޑް-19 އަށް ފައްސިވެއްޖެއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން އާންމު ކުރި ތަފާސް ހިސާބުތަކަށް ބަލާއިރު، މިއަދު ފައްސިވެފައިވާ 954 މީހުންގެ ތެރެއިން 514 މީހަކު ފައްސިވެފައިވަނީ މާލެ ސަރަހައްދުންނެވެ. އަދި 326 މީހަކު އަތޮޅު ތެރޭގެ ރަށްތަކުން ފައްސިވެފައިވާއިރު، 36 މީހަކު ފައްސިވެފައިވަނީ ރިސޯޓުތަކުންނެވެ.
އެޗްޕީއޭއިން ބުނީ، މިއަދު ފައްސިވެފައިވާ މީހުންނަކީ ފާއިތުވި 24 ގަޑިއިރު ކޮވިޑަށް ޓެސްޓް ކުރި 7273 މީހުންގެ ތެރެއިން ފައްސިވެފައިވާ މީހުން ކަމަށެވެ. އޭގެ ތެރެއިން 3،605 ސުންކަކީ މާލެ ސަރަހައްދުން ނަގާފައިވާ ސުންކުތަކެވެ.
މާލެ ސަރަހައްދުން ކޮވިޑަށް ފައްސިވާ މީހުންގެ އިންސައްތަ 14 އިންސައްތައިގައި އުޅޭއިރު، މިވަގުތު ރާއްޖޭގައި ކޮވިޑް ޖެހިފައި ތިބި މީހުންގެ އަދަދު ވަނީ 4،877 އަށް އަރާފައެވެ.
ރާއްޖޭން މިހާތަނަށް 102،372 މީހަކަށް ކޮވިޑް ޖެހިފައިވާއިރު، އޭގެ ތެރެއިން 97،217 މީހަކު ވަނީ ބަލިން ރަނގަޅުވެފައެވެ. އަދި މިވަގުތު 23 މީހަކަށް ހޮސްޕިޓަލުގައި ފަރުވާ ދެމުން އަންނައިރު، މިބަލީގައި ރާއްޖޭން 265 މީހަކު ވަނީ ނިޔާވެފައެވެ.
