އދ. ދަނގެތީގައި މަރާލާފައި އޮއްވާ ފެނުނު މަހުމޫދު އަބޫބަކުރު (މަހުމޫދުބެ) މަރާލި ކަމަށް، ތުހުމަތު ކުރެވޭ ޝާ އަލޮމް މިއާ (ސާލިމް) ކޯޓުގައިވެސް އިއުތިރާފުވެއްޖެ އެވެ.
މަހުމޫދުބެ މަރާލި މައްސަލައިގައި މިއަދު ބޭއްވި އަޑުއެހުމުގައި ސާލިމް ވަނީ އޭނާގެ މައްޗަށް ކޮށްފައިވާ ދައުވާއަށް އިއުތިރާފުވާ ކަމަށާއި އެކަމަށް އިއުތިރާފު ވަނީ އެއްވެސް މަޖުބޫރު ކަމެއް ނެތި ކަމަށް ބުނެފަ އެވެ.
އަޑުއެހުމުގައި ދައުލަތުން އޭނާއަށް ހަމަޖައްސައިދީފައިވާ ވަކީލު ވިދާޅުވީ، ސާލިމް އެ ކުށް ކޮށްފައިވަނީ ޝައިތޯނާ ބޮލަށް އެރިގެން ކަމަށް އޭނާ ބުނެފައިވާ ކަމަށެވެ. އަދި އެކުށަށް މައާފަށް އެދޭ ކަމަށާއި އިއުތިރާފުގެ އެއްބަސްވުމެއް ހަދަން ބޭނުންވާ ކަމަށްވެސް ވިދާޅުވި އެވެ.
އެކަމާ ގުޅިގެން ވާހަކަދައްކަމުން ދައުލަތުގެ ވަކީލް ވިދާޅުވީ، މި މައްސަލައަކީ މަރުގެ މައްސަލައަކަށްވުމުން މައްސަލަ ސާބިތުވެއްޖެ ނަމަ މަރަށް މަރު ހިފަން ބޭނުންވާ ކަމަށް ވާރިސުން ބުނެފައިވާ ކަމަށެވެ. އެހެންކަމުން ސާލިމްއާއެކު އިއުތިރާފް އެއްބަސްވުން ނުހެދުމަށް ނިންމާފައިވާ ކަމަށް ވިދާޅުވި އެވެ.
މަހުމޫދު މަރާލި ކަމަށް ސާލިމް ކޯޓުގައި އިއުތިރާފުވުމުން މައްސަލަ ބައްލަވާ ގާޒީ ވަނީ، އެ މައްސަލަ ދެން ކުރިއަށްދާނީ އަވަސް ނިޔާގެ މައްސަލައެއްގެ ގޮތުގައި ކަމަށް ވިދާޅުވެފަ އެވެ. އަދި މައްސަލައިގެ އިތުރު އަޑުއެހުމެއް މި މަހުގެ 26 ވަނަ ދުވަހު ބާއްވާނެ ކަމަށް ވިދާޅުވި އެވެ.
މަހުމޫދު މަރާލާފައި އޮއްވައި ފެނުނީ މިދިޔަ ސެޕްޓެމްބަރު މަހުގެ 14 ވަނަ ދުވަހުގެ ރޭ ގެއިން ނުކުމެގެން ދިޔަ ގޮތަށް ހަބަރެއް ނުވެގެން ހޯދަމުން ދަނިކޮށް، ފަޅުގޯއްޗެއްގެ ތެރޭގައި ހުރި ފެންވަޅެއްގެ ތެރެއަށް ބޮލާއި ފައިގައި ގޯންޏެއް އަޅުވައި ވައްޓާލާފައި އޮއްވަ އެވެ.
