ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ނޫސްވެރިންގެ ބައްދަލުވުމެއް މިއަދު ބާއްވަން ނިންމައިފި އެވެ.
އެޗްޕީއޭ އިން މީޑިއާތަކަށް ފޮނުވާފައިވާ ދައުވަތުގައި ބުނެފައިވާ ގޮތުން އެ ނޫސްވެރިންގެ ބައްދަލުވުން ބާއްވަނީ މިއަދު މެންދުރު 1:00ގަ އެވެ.
ހެލްތު މިނިސްޓްރީގައި ބާއްވާ އެ ބައްދަލުވުމުގައި މައުލޫމާތު ދެއްވާނީ އެޗްޕީއޭގެ އެޕިޑެމިއޮލޮޖިސްޓް، ޑރ. އިބްރާހީމް އަފްޒަލް އާއި އެޗްޕީއޭގެ އިމިއުނައިޒޭޝަން ޕްރޮގްރާމްގެ ފަރާތުން، ޕަބްލިކް ހެލްތް ޕްރޮގްރާމްގެ މެނޭޖަރު ނާޝިޔާ އަބްދުލް ގަފޫރެވެ.
ރާއްޖޭގައި ކޮވިޑު އަނެއްކާވެސް ހަލުވިކަމާއެކު ފެތުރި، ހާލަތު ގޯސްވެފައިވާ މިދަނޑިވަޅުގައި ނޫސްވެރިންގެ ބައްދަލުވުމެއް މި ބާއްވަނީ ބެލެވޭ ގޮޮތުގައި އާ ފިޔަވަޅުތަކެއް އިއުލާން ކުރުމަށެވެ.
ރާއްޖެއިން އިއްޔެވެސް 2،349 މީހުން ކޮވިޑަށް ޕޮޮޒިޓިވްވެފައިވެ އެވެ. އަދި އެއާއެކު ރާއްޖޭން ކޮވިޑަށް ޕޮޒިޓިވްވި މީހުންގެ ޖުމުލަ އަދަދު 114،977 އަށް ވަނީ އަރައިފަ އެވެ. އެކްޓިވް ކޭސްތަކުގެ އަދަދު 13،035 ގައި އުޅޭ އިރު، 48 މީހަކަށް ހޮސްޕިޓަލުތަކުގައި އެޑްމިޓު ކޮށްގެން ދަނީ ފަރުވާ ދެމުންނެވެ
