އދ. ދަނގެތީގެ ވިޔަފާރިވެރިޔާ މަހުމޫދު އަބޫބަކުރު މަރާލީ ޝާ އަލޮމް މިއާ (ސާލިމް) ކަން ޝަރީއަތަށް ސާބިތުވާ ކަމަށް މައްސަލަ ބައްލަވާ ކްރިމިނަލް ކޯޓުގެ އިސް ގާޒީ އަހްމަދު ޝަކީލް ނިންމަވައިފިއެވެ.
މަހުމޫދު މަރައިލި މައްސަލައިގައި ސާލިމްގެ މައްޗަށް ދައުލަތުން އުފުލައިފައި ވަނީ ގަސްދުގައި މީހަކު މެރުމުގެ ކުށުގެ ދައުވާ އާއި މައްޔިތާގެ ބޭނުން ނަހަމަ ގޮތުގައި ކުރުމުގެ ކުށުގެ ދައުވާ އެވެ. މި ދެ ދައުވާއަށް ވެސް އެއްވެސް މަޖުބޫރު ކަމެއް ނެތި ސާލިމް ވަނީ އިއުތިރާފްވެފަ އެވެ.
ތަކުރާރުކޮށް ކުށަށް އިއުތިރާފްވުމުން މައްސަލަ ބައްލަވާ ގާޒީ ޝަކީލް ނިންމެވީ ސާލިމްގެ އިއުތިރާފުން މަހްމޫދު މަރާލީ އޭނާ ކަން ޝަރީއަތަށް ސާބިތުވާ ކަމަށެވެ. އެހެންކަމުން ދެން އޮންނާނީ ވާރިސުންގެ ބަސް ނެގުމަށް ފަހު އަދަބު ކަނޑައެޅުން ކަން ގާޒީ ފާހަގަ ކުރެއްވިއެވެ.
މިއަދުގެ އަޑުއެހުން ނިންމަވާލަށްވަމުން އިސްގާޒީ ޝަކީލް ވިދާޅުވީ މަހްމޫދުގެ ވާރިސުންގެ ގޮތުގައި ތިބި ބައެއް ފަރާތްތައް މިވަގުތު ތިބީ ކަރަންޓީނުގައި ކަމަށެވެ. އެހެންކަމުން މި މައްސަލައިގެ އަޑުއެހުމެއް ފެބްރުއަރީ މަހުގެ 7 ވަނަ ދުވަހުގެ ހެނދުނު 10:00 އަށް ތާވަލުކޮށް ވާރިސުންގެ ބަސް ނަގާނެކަމަށް އިސް ގާޒީ ޝަކީލް މިއަދު ވިދާޅުވިއެވެ.
