ކަސްޓަމްސްގެ ބެލުމުގެ ދަށުގައި ހުރި ގިނަ އަދަދެއްގެ ބަނގުރާ ފުޅި ނައްތާލައިފި އެވެ.
ކަސްޓަމްސް އިން ބުނީ މި ތަކެތި ނައްތާލާފައި ވަނީ ފެބްރުއަރީ 2 ވަނަ ދުވަހު ސ.ހިތަދޫ ކުނި ނައްތާލާ ސަރަހައްދުގައި ކަމަށެވެ.
އެގޮތުން ކަސްޓަމްސް އިން ނައްތާލި ތަކެތީގެ ތެރޭގައި ހިމެނެނީ 97 ބަނގުރާ ފުޅި އާއި ބަނގުރާ އެކުލެވޭ 14 ބިޔަރު ދަޅެވެ.
ކަސްޓަމްސް އިން ބުނީ މި ތަކެތި ނައްތާލައިފައި ވަނީ ކަސްޓްމްސްގެ އާންމު ގަވާއިދުގެ 269 ވަނަ މާއްދާގެ ދަށުން ބޮންޑެޑް ވެއާހައުސްގައި ހުންނަ މުދާ ހަލާކުވުމުން ނުވަތަ މުއްދަތު ހަމަވުމުން ނުވަތަ މި ނޫންވެސް ސަބަބަކާހުރެ ނައްތާލުމުގައި ކަސްޓަންސް އިން އަމަލުކުރާ އުސޫލުގެ ދަށުން ކަމަށެވެ.
އެކިއެކި ސަބަބުތަކާހުރެ ކަސްޓަމްސް ގައި ހިފެހައްޓާފައި ހުންނަ ތަކެތި ކަނޑައަޅާފައިވާ އުސޫލުގެ ދަށުން ނައްތާލާނެ ކަމަށް ކަސްޓަމްސްގެ އާންމު ގަވާއިދުގައި ބަޔާން ކޮށްފައިވާ ކަމަށް ކަސްޓަމްސް އިން ބުނެ އެވެ.
