ކޮމަންޑޫ ދާއިރާގެ ބައި އިލެކްޝަނުގައި ވާދަކުރާ އެމްޑީޕީގެ ކެންޑިޑޭޓް މުހައްމަދު ރާޝީދު (ރާޑޯ)އަށް ވޯޓު ދިނުމަކީ ދުނިޔެވީ ގޮތުން ރައްޔިތުންގެ މައްޗަށް ވާޖިބެއް ކަމަށް ޖުމްޙޫރީ ޕާޓީގެ ލީޑަރު ގާސިމް އިބްރާހިމް މިއަދު ވިދާޅުވެއްޖެ އެވެ.
ކޮމަންޑޫގައި މިއަދު ބޭއްވި ކެމްޕެއިން ޖަލްސާގައި ގާސިމް ވިދާޅުވީ އަންނަ ހޮނިހިރު ދުވަހު އޮންނަ ކޮމަންޑޫ ދާއިރާގެ ބައި އިލެކްޝަނުގައި ރާޑޯއަށް ވޯޓު ދިނުމަކީ އެކި ގޮތުން ސަރުކާރަށާއި ރައްޔިތުންނަށް އެހީ ލިބިގެންދާނެ ކަމެއް ކަމަށެވެ. ގާސިމް ވިދާޅުވީ އެމްޑީޕީއަށް މި ގޮނޑި މުހިންމުވަނީ ހަމައެކަނި ކޮމަންޑޫ ދާއިރާގެ ތަރައްގީއަކަށް ނޫންކަމަށެވެ.
މި ދާއިރާގެ އިންތިހާބުން މުޅި ރާއްޖެއަށް މުހިންމުވަނީ އެއިރެއްގެ އޮންނަ ސަރުކާރަށް ރައްޔިތުންގެ އެއްވަންތަކަމާއި އެއްބާރުުލުން ލިބިގެން ދިއުމަކީ ސަރުކާރަށް އެހީއާ ލޯނު ދިނުމުގައި ވަރަށް މުހިންމު ދައުރެއް ކުޅޭ ކަމެކެވެ. ގާސިމް ވިދާޅުވީ އެމްޑީޕީގެ 64 ހަތަރު މެމްބަރުންނާއި ޖުމްހޫރީ ޕާޓީގެ މެމްބަރުންނާއެކު ރައްޔިތުންގެ މަޖިލީހުން ގާނޫނު އަސާސީވެސް ބަދަލު ކުރެވިދާނެ ކަމަށާއި މި އުޅެނީ މެންބަރުން މަދުވެގެން ނޫން ކަމަށެވެ.
އަދި ރައީސުލް ޖުމްހޫރިއްޔާ އާއި އެމްޑީޕީގެ މޫނުމަތީ ޖެހުމުން ކޮމަންޑޫ ދާއިރާގެ ތަރައްގީއަށްވާނެ ގޮތް ވިސްނުމަށް ވެސް ތަކުރާރުކޮށް ގާސިމް ވަނީ އެދިވަޑައިގެންފަ އެވެ.
އެންމެގެ އަމާންކަމާއި ސަލާމަތައްޓަކައިވެސް ކޮމަންޑޫ ދާއިރާއަށް އެމްޑީޕީގެ ކެންޑިޑޭޓް ހޮވަން ޖެހޭ ކަމަށްވެސް ގާސިމް ވިދާޅުވި އެވެ.
