ށ.ފޯކައިދޫގެ އާ އިންޖީނުގެ އާއި އޮފީސް މިރޭ ހުޅުވައިފި އެވެ.
މި އިންޖީނުގެ ހުޅުއްވައިދެއްވީ މިއަދު އެ ރަށަށް ކުރެއްވި ދަތުރުފުޅެއްގައި ރައީސް އިބްރާހިމް މުހައްމަދު ސޯލިހެވެ. މި ރަސްމިއްޔާތުގައި ރައްޔިތުންގެ މަޖިލީހުގެ ރައީސް، މުހައްމަދު ނަޝީދާއި ފެނަކައިގެ މެނޭޖިން ޑިރެކްޓަރު އަހުމަދު ސައީދު މުހައްމަދު ބައިވެރިވެވަޑައިގެންނެވިއެވެ.
މި ރަސްމިއްޔާތުގައި ވާހަކަފުޅުދައްކަވަމުން ރައީސް ސޯލިހް ވަނީ ފެނަކަ ކޯޕަރޭޝަން ލިމިޓެޑްގެ މެނޭޖިންގ ޑިރެކްޓަރާއި އެކުންފުނީގެ ހީވާގި މުވައްޒަފުންނަށް ޝުކުރުއަދާކުރައްވާފައެވެ.
ފޯކައިދޫގައި އަލަށް ގާއިމްކުރެވުނު އިންޖީނުގޭގެ ޖުމްލަ ކެޕޭސިޓީ ވަނީ 1.5 މވ އަށް ބަދަލުކުރެވިފައެވެ. އަދި ޑިސްޓްރިބިއުޝަން ނެޓްވޯކް އާކުރުމަށްޓަކައި ޖުމްލަ 3،000 މީޓަރުގެ ކޭބަލް ވަޅުލައި، 4 ޓްރާންސްފޯމަރު ބަހައްޓައި، ހައިވޮލްޓޭޖް ވިއުގައަކަށް ވަނީ ބަދަލުކުރެވިފައެވެ. މިއީ ދަތިކަމެއްނެތި ކުރިއަށް އޮތް 50 އަހަރަށް ބޭނުންވާ އިތުރު ވަސީލަތްތައް ފަހިކޮށް ފުރިހަމަކުރެވިފައިވާ ޒަމާނީ އިންޖީނުގެއެއް ކަމަށް ފެނަކައިން ބުނެއެވެ.
ރައީސް ވިދާޅުވީ، އަސާސީ ހިދުމަތްތައް ރައްޔިތުންނަށް ފޯރުކޮށްދިނުމަކީ އެމަނިކުފާނުގެ ވައުދެއްކަމަށެވެ. އަދި ފެނަކައިން ކުރަމުން އަންނަނީ އެ ވައުދު ފުއްދުމުގެ މަަސައްކަތްކަމަށް ރައީސް ސޯލިޙް ފާހަގަކުރެއްވި އެވެ.
ފެނަކައިން ކުރަމުންދާ މަސައްކަތުގެ ތެރެއިން 39 ރަށެއްގައި އައު އިންޖީނުގެ ނިންމާފައިވާއިރު، އަދި އިތުރު 31 ރަށެއްގައި އެމަސައްކަތް ކުރެވެމުން އަންނަކަމަށް ރައީސް ވަނީ ފާހަގަކުރައްވާފައެވެ.
ފާއިތުވި 70 އަހަރުން އަތޮޅުތެރޭގައި ގާއިމްކުރެވުނު ކަރަންޓުގެ ޖުމްލް ކެޕޭސިޓީ މިދިޔަ 3 އަހަރުން ފެނަކަ އާއިލާއިން ވަނީ ދެގުނަކޮށްފައެވެ.
