ސްޓެލްކޯގެ ކުރީގެ ޗެއާމަން މުހައްމަދު ރަޝީދުގެ ތައުޒިޔާގެ ދަފްތަރު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ހެނދުނު ހުޅުއްވައިދެއްވައިފިއެވެ.
ސްޓެލްކޯގައި އެކަމަށްޓަކައި ބޭއްވި ރަސްމިއްޔާތެއްގައި ރައީސް ވަނީ ތައުޒިޔާގެ ދަފްތަރުގައި ލިޔުއްވާފައެވެ. އެމަނިކުފާނު ލިޔުއްވި ބަޔާނުގައި މުހައްމަދު ރަޝީދު ރާއްޖޭގެ ހަކަތައިގެ ސިނާއަތަށް ދިގު މުއްދަތަކަށް ކުރެއްވި ހިދުމަތް ވަނީ ފާހަގަކުރައްވާފައެވެ.
ރަޝީދަކީ އެ ދާއިރާއަށް އިހުލާސްތެރި ގިނަ މަސައްކަތްތަކެއް ކޮށްދެއްވި ބޭފުޅެއް ކަމަށާއި، ކަމަށް ކަމޭހިއްތެވި، ފަރުވާތެރި އިންޖިނޭރެއް ކަމަށް ވެސް ރައީސް ލިޔުއްވިޔެވެ.
ތައުޒިޔާގެ ބަޔާނުގައި ރައީސް ވަނީ މާލޭގެ ކަރަންޓުގެ ހިދުމަތް ޒަމާނީކޮށް ފުޅާކުރުމުގައި ރަޝީދުގެ ދައުރު ފާހަގަކުރައްވާފައެވެ. އަދި އެއީ ތެދުވެރިކަމާއި އަމާނާތްތެރި ކަމުގެ ނަމޫނާއެއް ކަމުގައި ވެސް ރައީސް ލިޔުއްވިއެވެ.
އެ ރަސްމިއްޔާތުގައި ރައީސްގެ އިތުރުން ސްޓެލްކޯގެ މެނޭޖިން ޑިރެކްޓަރު ހަސަން މުގުނީ އާއި، އެ ކުންފުނީގެ އިސްވެރިންނާއި، މުހައްމަދު ރަޝީދުގެ އާއިލާގެ ބޭފުޅުން ބައިވެރިވެވަޑައިގަތެވެ.
