ބައިނަލްއަގުވާމީ އެކުވެރިކަމުގެ ދެވަނަ މެޗުގައި ބަންގްލަދޭޝްގެ ގައުމީ ވޮލީ ޓީމު އަތުން ރާއްޖެ ބަލިވެއްޖެއެވެ.
ރޭ ޒުވާނުންގެ މަރުކަޒުގެ އިންޑޯރ ކޯޓުގައި ކުޅުނު މި މެޗުގެ ފުރަތަމަ ސެޓު ކާމިޔާބުކުރީ ބަންގްލަދޭޝް ޓީމުންނެވެ. އެއީ 25 ޕޮއިންޓް 19 ޕޮއިންޓުންނެވެ. ނަމަވެސް ޖެހިގެން އައި ދެވަނަ ސެޓު ރާއްޖޭން ވަނީ ފަސޭހަ ކަމާއެކު 25 ޕޮއިންޓް 16 ޕޮއިންޓުން ކާމިޔާބުކޮށް އުއްމީދު އައުކޮށްފައެވެ. ނަމަވެސް ދެން ކުޅުނު ދެ ސެޓު 25 ޕޮއިންޓް 15 ޕޮއިންޓް އަދި 25 ޕޮއިންޓް 11 ޕޮއިންޓުން ކާމިޔާބުކޮށް ބަންގްލަދޭޝް އިން މި މެޗު ކާމިޔާބުކުރިއެވެ.
ޔޫތު މިނިސްޓަރު އަހުމަދު މަހުލޫފްގެ އިސްނެންގެވުމުގެ މަތިން ބަންގްލަދޭޝް ޓީމާ ދެކޮޅަށް ރާއްޖޭން ޖުމްލަ ތިން މެޗެއް މާލޭގައި ކުޅުމަށް ވަނީ ހަމަޖެހިފައެވެ. އޭގެ ތެރެއިން ދެ މެޗު މިހާރު ކުޅެވުނުއިރު ފަހު މެޗު ކުޅުމަށް ހަމަޖެހިފައިވަނީ އަންނަ ހުކުރު ދުވަހުގެ ރެއެވެ.
ރޭގެ މެޗު ޝަރަފްވެރިކޮށްދެއްވުމަށް ރައީސް އިބްރާހިމް މުހައްމަދު ސޯލިހާއި ނައިބު ރައީސް ފައިސަލް ނަސީމް އަދި ޔޫތު މިނިސްޓަރު މަހުލޫފް ވަޑައިގެންނެވި އެވެ. އަދި ރައީސް ސޯލިހާއި މިނިސްޓަރު މަހުލޫފްގެ ދައުވަތަކަށް ރާއްޖެ ވަޑައިގެން ހުންނެވި، ބަންގްލަދޭޝް ވޮލީބޯޅަ ފެޑެރޭޝަންގެ ރައީސް އަދި ޑާކާގެ ނޯތު ސިޓީ ކޯޕަރޭޝަންގެ މޭޔަރު މުހައްމަދު އަތީގުލް އިސްލާމް ވެސް މި މެޗަށް ވަޑައިގެންނެވި އެވެ.
