ފިއްލަދޫ ފުޓްސަލް ދަނޑު ތަރައްގީކުރަން ކައުންސިލުން ތައްޔާރުވަނިކޮށް ދަނޑުގައި ކެޔޮގަސް އިންދައިފިއެވެ.
އެކަމާ ގުޅޭގޮތުން ގޮށްކޮޅަށް މައުލޫމާތު ހިއްސާ ކުރަމުން ފިއްލަދޫ ކައުންސިލްގެ ނައިބުރައީސް މުޙައްމަދު ރަޒީފް ވިދާޅުވީ ދަނޑުގެ މަރާމާތު ކުރުން ލަސްވަމުން ދާތީ 2022 ވަނަ އަހަރު ކައުންސިލް ބަޖެޓް ފާސްކުރިއިރު ހަތަރު ލައްކަ ރުފިޔާ އެކަމަށް ފާސްކޮށްފައިވާނެކަމަށެވެ.
“މިއަދު އެކަން ކުރި ޒުވާނުންނަށް ވެސް އެނގޭ ދަނޑުގެ މަސައްކަތް ކުރިއަށް ދާކަން، އެކަން ނޭނގިގެންނޫން ގަސް އިންދީކީ، މީހުންގެ ސަމާލުކަން ހޯދަން ސްޓަންޓެއް ޖަހަން ކުރިކަމެއް އެއީ.” ފިއްލަދޫ ކައުންސިލްގެ ނައިބުރައީސް މުޙައްމަދު ރަޒީފް ވިދާޅުވިއެވެ.
ދަނޑު ހެދިގެން ދާއިރު ފެންސާއި ލައިޓުތައް އިތުރުން ފެންހިންދާ ނިޒާމްވެސް ރަނގަޅު ކުރެވިގެން ދާނެކަމަށް ނައިބުރައީސް ވިދާޅުވިއެވެ. އަދި ރޯދަމަހަށް ދަނޑު ނިންމާލަން މަސައްކަތް ކުރާކަމަށްވެސް ނައިބުރައީސް ވިދާޅުވިއެވެ.
