ރާއްޖޭގެ ހަ ރަށެއްގައި އެއާޕޯޓްތަކެއް ތަރައްގީކުރުމަށް ނިންމައި ކުރިން ހުށަހެޅި އަގު ކުޑަކޮށް އަލުން އެ އެއާޕޯޓްތައް ހަދައިދޭނެ ފަރާތްތައް ހޯދަން އިއުލާންކޮށްފި އެވެ.
ޑިސެމްބަރު މަހުގެ 20 ވަނަ ދުވަހު ކުރި އިއުލާންގައި ހަ އެއާޕޯޓަށް ބިޑް ކުރެވޭނެ އެންމެ ކުޑަ އަގެއް ކަމަށް ބުނެފައި އޮތީ ފަސް މިލިއަން ޑޮލަރެވެ. އެހެން ނަމަވެސް އެއަދަދު ދަށްކޮށް ޕްލޭނިންގ މިނިސްޓްރީން މިއަދު ކުރި އިއުލާންގައި އެ އަދަދު ތިން މިލިއަން ޑޮލަރަށް ކުޑަކޮށްފަ އެވެ.
ބީލަމުގެ އުސޫލަށް އެހެން ބަދަލެއް ވެސް ގެނެސްފައިވާ އިރު، އެ ބަދަލުގައި ވަނީ މުޅި އެއާޕޯޓް ތަރައްގީކުރުމަށް ބޭނުންވާ ފައިނޭންސް ނުވަތަ އެ މަޝްރޫއުގެ ބައެއް ފައިނޭންސް ކުރެވޭނެ ގޮތަށް ހުށަހެޅިދާނެ ކަމަށް ބުނެފައެވެ. ކުރީގެ އިއުލާނުގައިވާ ގޮތުން ބިޑް ހުށަހެޅޭނީ މުޅި އެއާޕޯޓް ތަރައްގީކުރުމަށް ނުވަތަ ފައިނޭންސް ކުރުމަށް އެކަންޏެވެ. އަދި ބިޑް ކުރެވޭ އަގަށާއި ފައިނޭންސް ކުރެވޭ ގޮތަށް ބަދަލު ގެނައި ނަމަވެސް، މިބަދަލު ގެނައީ ކޮން ސަބަބަކާ ހުރެ ކަމެއް ބުނެފައެއް ނުވެއެވެ.
މިނިސްޓްރީން އިއުލާނުކޮށްފައިވާ ބީލަމުގައިވާ ގޮތުން، އެއާޕޯޓް ތަރައްގީކުރަން ހުށަހަޅާ އިންވެސްޓްމަންޓްގެ އަދަދު އެ މަޝްރޫއުގެ މުގާބިލުގައި ޓޫރިޒަމަށް ކުއްޔަށް ދޫކުރާނެ ރަށް/ބިން ނުވަތަ ފަޅުގެ އިކްއިޒިޝަން ކޮސްޓާއި އެތަނުގެ ބިމު ކުލީގެ ގޮތުގައި ކަނޑައަޅާ ފައިސާގެ އަދަދުން ކަނޑައިދޭނެއެވެ.
މި މޮޑެލްގެ ދަށުން ބިޑްކުރުމުގެ ދައުވަތަކާ ނުލައި ސަރުކާރަށް ޕްރޮޕޯޒަލް ހުށަހެޅުމުގެ އުސޫލުގެ ދަށުން، ޝައުގުވެރިކަން ފާޅުކޮށް ހުށަހަޅަންޖެހެނީ އިކޮނޮމިކް މިނިސްޓްރީ އަށެވެ.
ޕްލޭނިން މިނިސްޓްރީގެ އިއުލާންގައި ބުނެފައިވަނީ ކޮންމެ އެއާޕޯޓަކީ ވެސް ވަކި މަޝްރޫއަކަށް ވާތީ ޝައުގުވެރިކަން ފާޅުކުރާއިރު ތަރައްގީކުރަނީ ނުވަތަ ފައިނޭންސް ކުރަނީ ކޮން އެއާޕޯޓު މަޝްރޫއަކަށް ކަން ބަޔާންކުރަން ޖެހޭނެ ކަމަށެވެ.
އެއަރޕޯޓް ތަރައްޤީކުރުމަށް ހުޅުވާލި ރަށްތަކަކީ ބ. ތުޅާދޫ، ށ. ބިލެތްފަހި، ތ. ވިލުފުށި، ހދ. މަކުނުދޫ، ފ.މަގޫދޫގެ އިތުރުން ރ.އަތޮޅުގެ ދެކުނު ބިތުގައި އެއަރޕޯޓް ތަރައްޤީކުރުމަށެވެ.
