ހިތުގެ ވޭލުތައް ބަދަލުކުރުމަށްޓަކައި، ހިތް ފަޅާ ނުލައި ކުރާ ސާޖަރީއެއް ކަމަށްވާ ޓްރާންސް-އެއޯޓިކް ވޭލްވް އިމްޕްލާންޓް ސާޖަރީއެއް އޭޑީކޭގައި ކާމިޔާބުކަމާ އެކު ކޮށްފިއެވެ.
އޭޑީކޭއިން ބުނީ މި ސާޖަރީ ކޮށްފައިވަނީ 81 އަހަރުގެ ދިވެހި ފިރިހެނެއްގެ ކަމަށެވެ. އަދި މިއީ ވަކި ކަންތައްތަކަކަށް ބަލައި، ހޮވާލެވޭ މަދު ބަޔަކަށް ނޫނީ ނުކުރެވޭ ސާޖަރީއެއް ކަމަށް ވެސް އެ ހޮސްޕިޓަލުން ބުނެއެވެ.
ހިތުގެ ވޭލު ހަރަކާތް ނުކުރުމަކީ، ހިތަށް ދިމާވާ ނުރައްކާތެރި މައްސަލައެކެވެ. އެކަން އާންމުކޮށް ހައްލުކުރަނީ ހިތް ފަޅާލައިގެން ކުރާ އޯޕަން ހާޓް ސާޖަރީއަކުންނެވެ. މިއީ އެފަދަ ސާޖަރީ އަކާ ނުލައި ރާއްޖޭގައި އެ މައްސަލަ ހައްލުކުރެވުނު ފުރަތަމަ ފަހަރެވެ. އަދި މި ސަރަހައްދުގެ ގައުމުތަކުގެ ތެރެއިން ޓަވީޕް ސާޖަރީއެއް ތިން ވަނައަށް ހެދި ގައުމެވެ.
