އދ. ދަނގެތީގައި މަރައިލި އެ ރަށު ވިޔަފާރިވެރިޔާ މަހްމޫދު އަބޫބަކުރުގެ ގާތިލް ޝާހް އަލޮމް މިއާ (ސާލިމް) މެރުމަށް ކްރިމިނަލް ކޯޓުން ދެންމެ ހުކުމްކޮށްފި އެވެ.
ސާލިމް މެރުމަށް ކޯޓުން ދެންމެ ހުކުމްކުރީ މަހްމޫދުގެ ހުރިހާ ވާރިސުން ވެސް އިސްލާމީ ޝަރީއަތުގައިވާ ގޮތުގެ މަތިން މަރަށް މަރު ހިފަން ބޭނުންވާ ކަމަށް ބުނެފައިވާތީ އެވެ.
މިއީ ރާއްޖޭގައި ބިދޭސީއެއްގެ މައްޗަށް މަރުގެ އަދަބެއް ކަނޑައެޅި ފުރަތަމަ ފަހަރެވެ.
ގާޒީ އަހްމަދު ޝަކީލް ވިދާޅުވީ، ވާރިސުން އެދިފައިވާ ގޮތަށް އިސްލާމީ ޝަރީއަތުގައިވާ އުސޫލުތަކާއި ޚިލާފު ނުވާނެ ގޮތުގެ މަތިން ސާލިމް މަރާލަން ދައުލަތުގެ ކަމާ ބެހޭ ފަރާތްތަކަށް އަމުރު ކުރައްވާ ކަމަށެވެ.
ވިޔަފާރިވެރިޔާ މަހްމޫދުގެ ހަށިގަނޑު ފެނުނީ އޮކްޓޯބަރު 14، 2021 ގައެވެ. އޭގެ ކުރީ ރެއިން ފެށިގެން މަހްމޫދުގެ ޚަބަރެއް ނުވެގެން އާއިލާއިން އުޅުމުން، ރަށު އެންމެން ނުކުމެ ހޯދަން އުޅުމުގެ ތެރެއިން މަހްމޫދުގެ ހަށިގަނޑު ފެނުނީ އޭނާގެ އުފަންގޭގެ ފެން ވަޅެއް ތެރޭ އޮއްވައެވެ. އެ ގެ މިހާރު ހުންނަނީ ފަޅަށެވެ.
ޝަރީއަތުގެ މަޖިލީހުގައި ސާލިމް އެއްބަސްވެފައިވަނީ އޭނާ މަހްމޫދު މަރާލީ ފައިސާގެ ދަހިވެތިކަމުގައެވެ. މި ގޮތުން ތޫނު ވަޅިއަކުންނާއި ކޮޅު ތޫނު ކޮށްފައިވާ ތިން ދަގަނޑު ބުރިއަކުން މަހްމޫދުގެ މެޔާއި، ބޮލާއި، ކަރަށް ހަމަލާ ދީފައިވާ ކަމަށް ސާލިމް އެއްބަސްވެފައިވެއެވެ.
ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާގެ އިތުރުން މައްޔިތާގެ ބޭނުން ނަހަމަ ގޮތުގައި ހިފުމުގެ ކުށުގެ ދައުވާ ވެސް ދައުލަތުން ސާލިމްގެ މައްޗަށް އުފުލާފައިވެއެވެ. ދެވަނަ ދައުވާއަށް ވެސް ސާލިމް އިއުތިިރާފްވެފައިވާތީ އެއް މަހާއި 24 ދުވަހުގެ ޖަލު ހުކުމެއް އެ ކުށަށް އިއްވާފައިވެއެވެ.
ދަށު ކޯޓުން ސާލިމް މަރަން ހުކުމް އިއްވި ނަމަވެސް، މަރުގެ މައްސަލަތަކުގައި ޝަރީއަތުގެ ތިން މަރުހަލާ ފުރިހަމަ ކުރަން ގާނޫނުގައި ލާޒިމުކޮށްފައިވެއެވެ. އެހެންވެ މި މައްސަލަ ވެސް ކުށް ކުރި ކަން ޔަގީން ކުރަން އަދި ހައި ކޯޓާއި ސުޕްރީމް ކޯޓުގައި ޝަރީއަތް ގެންދަން ޖެހޭނެއެވެ.
