ހެލްތު ޕްރޮޓެކްޝަން އެޖެންސީ (އެޗްޕީއޭ) ތެރެއިން ފޭކު ވެކްސިން ކާޑު ހަދައިދޭ މައްސަލަ ފުލުހުން ތަހުގީގުކުރަން ފަށާފައިވާކަމަށް އެ އިދާރާއިން މިއަދު ބުނެފިއެވެ.
އެޗްޕީއޭ ތެރެއިން ވެކްސިން ކާޑު ވިއްކާ މައްސަލަ މީގެ ކުރިން މީޑިއާއަށްވަނީ ފެންމަތިވެފައެވެ. އެގޮތުން އެޗްޕީއޭގެ ސިސްޓަމް ބޭނުންކޮށްގެން ހުރިހާ ޕޯޓަލަކާއި ޑާޓާބޭސްއިން ވެކްސިން ނުޖަހާ މީހުންނަށް ވެކްސިން ޖެހިކަން ފެންނަ ގޮތަށް އިންތިޒާމުކޮށްދީ ވެކްސިން ކާޑު އަގުނަގައިގެން ހަދައިދެމުންދާކަންވަނީ ހާމަވެފައެވެ.
އެގޮތުން ވެކްސިން ކާޑެއް މިހާރު ވިއްކަމުންދާ އަގަކީ 1،500 ރުފިޔާއާއި 2،000 ރުފިޔާއާ ދެމެދުގެ އަގެއްކަމަށް “ދިޔަރެސް”އަށް މުއުތަބަރު މަސްދަރުތަކުން މައުލޫމާތު ލިބިފައިވެއެވެ.
ފުލުހުންގެ މީޑިއާ އޮފިޝަލް މީޑިއާއަށް މައުލޫމާތު ދެއްވަމުން ވިދާޅުވީ އެޗްޕީއޭ ތެރެއިން ވަގު ވެކްސިން ކާޑު ހައްދައިދޭ މައްސަލައެއް އެ އިދާރާއަށް ހުށަހެޅިފައިވާ ކަމަށެވެ. އަދި އެ މައްސަލަ މިހާރު އެ އިދާރާއިން ތަހުގީގުކުރަމުންދާ ކަމަށެވެ.
މީގެ ކުރިން މި މައްސަލަ ފެންމަތިވުމާއެކު ހެލްތު މިނިސްޓްރީން ބުނެފައިވަނީ އެފަދަ މައްސަލަތައް ބަލައި އެކަންކަން ހުއްޓުވުމަށް ފިޔަވަޅުތައް އަޅަމުންދާނެ ކަމަށެވެ. ނަމަވެސް މިހާތަނަށް އެ މަސައްކަތް ހުއްޓުވިފައިނުވެއެވެ.
