ސްޓެލްކޯގެ މެނޭޖިން ޑިރެކްޓަރުގެ މަގާމުގައި ހުންނެވި ހަސަން މުގުނީ އެމަގާމުން ވަކިކޮށް އިލެކްޝަންސް ކޮމިޝަންގެ ކުރީގެ ރައިސް އަދި ފެނަކައިގެ ކުރީގެ އެމްޑީ އަހުމަދު ޝަރީފް ސްޓެލްކޯގެ އެމްޑީގެ މަގާމަށް އައްޔަނު ކޮށްފިއެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ގެ ރައީސް އާސިމް މުހައްމަދު ސޮއިކޮށް ސްޓެލްކޯ ބޯޑުގެ ޗެއަރމަންއަށް މިއަދު ފޮނުވި ސިޓީގައި ބުނެފައިވަނީ، ސްޓްލެކޯގެ ބޯޑަށް ބައެއް ބަދަލު ގެނައުމަށް ރައީސުލްޖުމްހޫރިއްޔާ ހުށަހަޅާފައިވާކަމަށެވެ.
އެހެންކަމުން ޕީސީބީން ސްޓެލްކޯގެ މެނޭޖިން ޑިރެކްޓަރުގެ މަގާމުގައި ހުންނެވި ހަސަން މުގުނީ އެ މަގާމުން ވަކިކޮށް، ކުންފުނީގެ ޑިރެކްޓަރުންގެ ބޯޑުގެ މެމްބަރުކަމަށާއި، މެނޭޖިން ޑިރެކްޓަރުކަމުގެ މަގާމަށް އަހުމަދު ޝަރީފް އައްޔަނުކޮށްފައިވާކަމަށެވެ.
ޝަރީފް އެންމެފަހުން ހުންނެވީ އިލެކްޝަންސް ކޮމިޝަންގެ ރައީސްގެ މަގާމުގައެވެ. އީސީގެ ރައީސްގެ މަގާމުން އިސްތިއުފާ ދެއްވުމަށްފަހު ޝަރީފް އަންނަނީ ސަރުކާރަށް އަދި ރައިސް ސޯލިހަށް ތާއީދުކޮށް ކޮށްފައި ހުންނަ ޓްވީޓްތައް ރިޓްވީޓް ކުރައްވަމުންނެވެ.
2018ގެ ރިޔާސީ އިންތިހާބަށްފަހު ޕީޕީއެމް ޕިއެންސީގެ އެންމެބޮޑު ފާޑުކިޔުމެއް އަމާޒުވާ އެއް ފަރާތަކީ ޝަރީފެވެ. އަދި މިފަހުންވެސް ކުރީގެ ރައީސް އަބްދުﷲ ޔާމީން ވަނީ ޝަރީފަށް ފާޑުވިދާޅުވެ ޖަލްސާއެއްގައި ވާހަކަ ދައްކަވާފައެވެ.
ސްޓެލްކޯގެ އެމްޑީގެ މަގާމުން ވަކިކުރި މުގުނީ އަކީ ޖުމްހޫރީ ޕާޓީއަށް ނިސްބަތްވާ ބޭފުޅެކެވެ.
