މިއަދު ހެނދުނު ގާތްގަނޑަކަށް 9:15 ހާއިރު އިންޖީނެއްގައި އަލިފާން ރޯވެ، ކުޅުދުއްފުށި ސިޓީން ކަރަންޓް ކެނޑިއްޖެއެވެ. ރޯވެފައި ވަނީ، 1.2 މެގަވޯޓްގެ އިންޖީނެއްގައެވެ. މި ހާދިސާގައި އެއްވެސް މީހަކަށް ގެއްލުމެއް ލިބިފައި ނުވެއެވެ.
މައުލޫމާތު ލިބިފައިވާ ގޮތުގައި މުޅި އެ ސިޓީން ކަރަންޓް ކެނޑިފައި ވަނީ، އެ އިންޖީނުގައި ހުޅު ހިފިކަން އެނގުނު ހިސާބުން، އިންޖީނު ގޭގައި ހުރި ހުރިހާ އިންޖީނެއް ނިންވާލަން ޖެހުމުންނެވެ.
ފެނަކަ ކޯޕަރޭޝަންގެ އޮފިޝަލަކު ވިދާލުވީ، އިންޖީނުގައި ހުޅު ހިފިތާ ކުޑަ ވަގުތުކޮޅެއްގެ ތެރޭގައި އަލިފާންގަނޑު ނިންވާލާފައިވާ ކަމަށެވެ.
ފެނަކައިން ބުނީ އެ ސިޓީއަށް އަލުން ކަރަންޓް ދިނުމަށް ކުރަންޖެހޭ ކަންކަން ކުރަމުން އަންނަ ކަމަށެވެ.
