ފެނަކަ ކޯޕަރޭޝަންގެ ފެނަކަ އިންސްޓިޓިއުޓުން ރާއްޖޭގެ ރަށްރަށުގެ އިންޖީނުގެތަކަށް ބޭނުންވާ ތަމްރީން ލިބިފަވާ މީހުން ބނާކުރުމުގެ ހިންގި ފުރަޔަމަ އިންޖީން ރިޕެއާ އެންޑް މެއިންޓަނަނަންސް ލެވެލް 3 ގެ ކޯހުގެ ފުރަތަމަ ބެޗް ރޭ ނިންމާލައި ބައިވެރިންނަށް ސެޓްފިކެޓް ދީފި އެވެެ.
މިއީ ފެނަކައިގެ އެޕްރެންޓިޝިޕް ޕްރޮގްރާމް (ފުނަރު ޕްރޮގްރާމް) ގެ ދަށުން ފެނަކަ ކޯޕަރޭޝަން ލިމިޓެޑް އިން ފޯރުކޮށްދޭ ތިން އަސާސީ ޚިދުމަތުގެ ދާއިރާ އަށް ފަންނީ މީހުން ތަރައްގީކޮށް ދިވެހިން ބިނާ ކުރުމަށްޓަކައި ފެނަކަ އިންސްޓިޓިއުޓް ފޮ ޓްރޭނިން އެންޑް ރިސާޗް އިން ހިންގި ތިން މަސް ދުވަހުގެ ޕްރޮގްރާމެކެވެ.
ފުނަރު ޕްރޮގްރާމް އިން އިންޖީން ރިޕެއާ އެންޑް މެއިންޓެނެންސް ގައި ބައިވެރިވާ ފަރާތްތަކަށް ޑީސަލް އިންޖީނުގެ ބައިތައް ކިޔައި ދިނުމާއި ޑީސަލް ޖަނަރޭޓަގެ މެއިންޓެނެންސް މަސައްކަތް ކުރާނެ އަމަލީ ތަޖުރިބާ ލިބިގެން ދިޔަ އެވެ. ޕްރޮގްރާމް ކުރިއަށް ގެންދެވުނީ މަހަކު 3،000ރ. ގެ އެލަވަންސެއް ލިބޭ ގޮތަށެވެ.
މި ޕްރޮގްރާމް ކުރިއަށް ގެންދިޔައީ ރާއްޖޭގެ އަށް ސަރަހައްދަކަށް އަމާޒުކޮށް އަށް ރަށެއްގަ އެވެ. އެއީ ށ. މިލަންދޫ، ހދ. ކުޅުދުއްފުށި، ނ. ވެލިދޫ، ތ. ވިލިފުށި، ޏ. ފުވައްމުލައް، ދ. ކުޑަހުވަދޫ، ބ. އޭދަފުށި އައްޑޫ ހިތަދޫގަ އެވެ.
އިންޖީން ރިޕެއާ އެންޑް މެއިންޓަނަނަންސް ލެވެލް 3 ގެ ކޯސް ފުރިހަމަ ކުރި ބައިވެރިންގެ ތެރޭގައި ތެރޭގައި ދެ އަންހެނުން ވެސް ހިމެނެ އެވެ.
މި ރަސްމިއްޔާތުގައި ދަސްވެނިންނަށް ސެޓްފިކެޓް ހަވާލުކޮށްދެއްވީ ހަޔާ އެޑިއުކޭޝަން މިނިސްޓަރު ޑރ. އިބްރާހިމް ހަސަނާއި ފެނަކަ ކޯޕޭޝަން ލިމިޓެޑްގެ ބޯޑް ޗެއާމަން މުހައްމަދު ރަޝީދުގެ އިތުރުން ފެނަކަ މެނޭޖިން ޑިރެކްޓަރު އަހުމަދު ސައީދު މުހައްމަދެވެ.
ރަސްމިއްޔާތުގައި އައްޑޫ ހައި ސްކޫލްގެ ޕްރިންސިޕަލް އިބްރާހިމް ނަދީމާއި ގދ. އަތޮޅު ތައުލީމީ މަރުކަޒުގެ ޕްރިންސިޕަލް ޝިފާޒް މުހައްމަދު ވެސް ބައިވެރިވެވަޑައިގެންނެވި އެވެ.
ފެނަކަ އަކީ ރާއްޖޭގެ 154 އަށް ވުރެ ގިނަ ރަށަށް ކަރަންޓްގެ ޚިދުމަތް ފޯރުކޮށްދޭ ކުންފުންޏެކެވެ.
