ރާއްޖޭގައި ހުންނަ ޖަޕާނު ހައި ކޮމިޝަނުން، ލ. ގަމު މުކުރިމަގު އަވަށު ސުކޫލަށް 1.2 މިލިއަން ރުފިޔާ ހަދިޔާކޮށްފިއެވެ.
އެޑިއުކޭޝަން މިނިސްޓްރީގައި މިއަދު ބޭއްވި ޙާއްޞަ ރަސްމިއްޔާތެއްގައި އެހީގެ އެއްބަސްވުމުގައި މުކުރިމަގު ސުކޫލުގެ ފަރާތުން ސޮއިކުރެއްވީ އެ ސުކޫލުގެ ޕްރިންސިޕަލް ޢަބްދުﷲ ޝަރީފެވެ. އަދި އެމްބަސީގެ ފަރާތުން އެއްބަސްވުމުގައި ސޮއިކުރެއްވީ އެ ގައުމުން ރާއްޖެ އަށް ކަނޑައަޅާފައި ހުންނަވާ ސަފީރު ޓަކުޗީ މިޑޯރީއެވެ.
“ގްރާސް ރޫޓްސް ހިއުމަން ސެކިއުރިޓީ ޕްރޮޖެކްޓް” (ޖީޖީޕީ)ގެ ދަށުން ހިލޭ އެހީގެ ގޮތުގައި ދިން މި ފައިސާއަކީ އެ ސުކޫލުގައި ދެ ކްލާސްރޫމު އެޅުމަށް ދިން ފައިސާއެވެ.
މި ދެ ކްލާސްރޫމް ބޭނުން ކުރާނީ އެލްކޭޖީ އަދި ޔޫކޭޖީގެ ދަރިވަރުންނަށެވެ. ހަމައެހެންމެ ގުދުރަތީ ކާރިސާއެއް ކުރިމަތިވެއްޖެ ހާލަތެއްގައި އިމަޖެންސީ އިވެކުއޭޝަން ޝެލްޓާއެއްގެ ގޮތުގައި ވެސް މި ފެސިލިޓީ ބޭނުން ކުރެވޭނެ ކަމަށް އެމްބަސީން ބުނެފައިވެއެވެ.
