ކުއްލި ހާލަތުގައި ކޮންމެހެން އަމަލުކުރަންޖެހޭ ގޮތުގެ ހަރަކާތެއް ބާއްވަން ރީޖަނަލް އެއާޕޯޓުތައް ބަލަހައްޓަން އުފެއްދު ކުންފުނި، ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރްއޭސީއެލް) އިން ނިންމައިފި އެވެ.
އެ ހަރަކާތް ކުރިއަށް ގެންދިއުމަށް ނިންމާފައި ވަނީ މާދަމާ ހދ. ހަނިމާދޫގަ އެވެ. މިއީ ރާއްޖޭގެ ތާރީހުގައި މިފަދަ ހަރަކާތެއް ކުރިއަށް ގެންދާ ފުރަތަމަ ފަހަރެވެ.
އާރްއޭސީއެލުން ބުނީ މި ހަރަކާތް ކުރިއަށް ގެންދިއުމަށް ނިންމާފައި ވަނީ 200 އަށްވުރެ ގިނަ ބައިވެރިންނާ އެކު ކަމަށެވެ.
މިއީ މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އާއި، ފުލުހުންނާއި، އޭވިއޭޝަން މޯލްޑިވްސް އާއި، އިމިގްރޭޝަނާއި، ކަސްޓަމްސާއި، ހަނިމާދޫ ހެލްތު ސެންޓަރާއި، ހަނިމާދޫ ކައުންސިލްގެ އިތުރުން އައިލެންޑް އޭވިއޭޝަން ގުޅިގެން ކުރިއަށް ގެންދާ ހަރަކާތެކެވެ.
ރީޖަނަލް އެއާޕޯޓްސް ކުންފުންޏަކީ ރާއްޖޭގެ ހުރިހާ ރީޖަނަލް އެއާޕޯޓުތަކެއް ވިޔަފާރި އުސޫލުން ހިންގަން އުފައްދާފައިވާ ކުންފުންޏެކެވެ.
