ހދ.ކުމުންދޫގެ ބަނދަރު ތަރައްޤީ ކުރުމުގެ މަޝްރޫޢުގެ މަސައްކަތްތައް ފެށިގެން ކުރިއަށް ދާ ކަމަށް މި މަސައްކަތާއި ހަވާލުވެފައިވާ އެމްޓީސީސީގެ ފަރާތުން ބުނެފިއެވެ. އެގޮތުން މިއަދު ވަނީ ނެރު ފުންކުރުމުގެ މަސައްކަތް ފަށާފައެވެ.
މިއީ 35.6 މިލިއަން ރުފިޔާ ގެ މަޝްރޫއުއެއް ކަމަށާއި މި މަޝްރޫއު ގެ ދަށުން، 14،301 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމަށް ހަމަޖެހިފައިވާ ކަމަށް އެފަރާތުން މައުލޫމާތު ދެއްވައެވެ.
މީގެ އިތުރުން 242 މީޓަރުގެ ސަރަޙައްދެއްގެ ބޭރުތޮށި ލުމާއި، 198 މީޓަރުގެ ސަަރަޙައްދެއްގައި ރިވެޓްމެންޓް ޖެހުމާއި، ނެރުބައްތި ހަރުކުރުމުގެ މަސައްކަތްވެސް މި މަޝްރޫއު ގެ ދަށުން ކުރިއަށް ގެންދިއުމަށް ނިންމާފައިވާ ކަމަށް އެމްޓީސީސީގެ ފަރާތުން މައުލޫމާތު ދެއްވައެވެ.
މި މަޝްރޫއު އެމްޓީސީސީއާ ހަވާލުކޮށްފައިވަނީ 5 އޮކްޓޯބަރު 2021ގަ އެވެ. އަދި މި ކޮންޓްރެކްޓުގެ މުއްދަތަކީ 210 ދުވަހެވެ.
