ރާއްޖޭގެ ގައުމީ އެއާލައިން މޯލްޑިވިއަން އިން ސްރީ ލަންކާ އަށް ދަތުރުތައް ފަށަން ނިންމައިފި އެވެ.
އެ އެއާލައިން ހިންގާ އައިލެންޑް އޭވިއޭޝަން (އައިއޭއެސް) މިއަދު ނެރުނު ބަޔާނެއްގައި ބުނީ، މި މަހުގެ 27 ވަނަ ދުވަހު ދަތުރުތައް ކުރާނީ މާލެ އިން ކޮލަމްބޯ އިންޓަނޭޝަނަލް އެއާޕޯޓް (ރަތުމަލާނާ އެއާޕޯޓް) އަށް ކަމަށެވެ.
އައިލެންޑް އޭވިއޭޝަނުން ބުނީ އެ އެއާޕޯޓަށް މޯލްޑިވިއަންގެ ދަތުރުތައް ފަށަން ނިންމީ އެއީ ގިނަ ދިވެހިން އުޅޭ ސަރަހައްދަކަށް ވާތީ ކަމަށެވެ. ދަތުރުތައް ފެށުމާއެކު ގިނަ ދިވެހިންނަށް ލުއިތަކެއް ލިބޭނެ ކަމަށް ވެސް އެ ކުންފުނިން ބުނެ އެވެ.
މޯލްޑިވިއަން އެއާލައިނުން ރަތުމަލާނާ އެއާޕޯޓަށް އަދި ތާވަލު ކޮށްފައިވަނީ ހަތަރު ދަތުރެވެ. އެއީ މި މަހުގެ 27، 29، 31 އަދި އަންނަ މަހުގެ 3 އަށެވެ. ނަމަވެސް ތަރުހީބަށް ބަލައި ފްލައިޓުތައް އިތުރު ކުރާނެ ކަމަށް މޯލްޑިވިއަނުން ބުންޏެވެ. ދަތުރުތަކުގެ އަގެއް ވެސް އަދި ހާމައެއް ނުކުރެ އެވެ.
މޯލްޑިވިއަން އެއާލައިންގައި ލަންކާ އަށް ދަތުރު ކުރަން ބޭނުންވާ މީހުންނަށް އެ އެއާލައިންގެ ވެބްސައިޓް އަދި މޯބައިލް އެޕްލިކޭޝަނުން ބުކިން ހެއްދޭނެ އެވެ
