ސިއްހީ ކުއްލި ނުރައްކަލުގެ ހާލަތު އުވާލުމާ އެކު، މާސްކު އެޅުން މަޖުބޫރު ނޫން ކަމަށް ހަމަޖައްސައި، އެޗްޕީއޭ އިން މިރޭ އެކަން އިއުލާނުކޮށްފި އެވެ.
ކޮވިޑް ހަލުވިކަމާ އެކު ފެތުރެން ފެށުމުން މުޅި ރާއްޖޭގައި މާސްކު އެޅުން މަޖުބޫރު ކުރީ، 7 ފެބްރުއަރީ 2021ގަ އެވެ.
ނަމަވެސް ކޮވިޑުން ރައްކާތެރިވުމަށް ފިޔަވަޅުތައް އަޅަން މީގެ ދެ އަހަރު ކުރިން އިއުލާނުކޮށް، ދައްމަމުން އައި ސިއްހީ ކުއްލި ނުރައްކަލުގެ ހާލަތު، މިއަދުން ފެށިގެން އުވާލިކަން ރައީސް އިބްރާހިމް މުހައްމަދު ސޯލިހު މިރޭ އިއުލާން ކުރެއްވުމާ އެކު އެޗްޕީއޭ އިން ވަނީ ކޮވިޑް ކޮންޓްރޯލުކުރުމަށް އަޅާފައިވާ ބައެއް ފިޔަވަޅުތަކަށް ބަދަލު ގެނެސްފަ އެވެ.
އެގޮތުން ރާއްޖޭގެ ހުރިހާ ސަރަހައްދުތަކެއްގައި މާސްކު އެޅުން މަޖުބޫރުވުން އުވާލައި ކޮވިޑުން ރައްކާތެރިވުމަށް މާސްކު އެޅުމަކީ އެދެވިގެންވާކަމެއްގެ ގޮތުގައި ވަނީ ހަމަޖައްސައިފަ އެވެ. ނަމަވެސް ބައެއް ތަންތަނުގައާއި ހާލަތްތަކުގައި މާސްކު އެޅުމަށް ވަނީ އިލްތިމާސްކޮށްފަ އެވެ. އެއީ
- ސިއްހީ ހިދުމަތް ދޭ ތަންތަނުގައި އުޅޭ މީހުންނާއި އެތަންތަނަށް ޒިޔާރަތްކުރާ މީހުން
- ކޮވިޑަށް ޕޮޒިޓިވްވާ ރޭޓް %20 އަށްވުރެ މަތިން ބަލިފެތުރޭ ކަމަށް ކަނޑައަޅާފައިވާ ރަށްރަށުގައި
އެޗްޕީއޭ އިން ބުނީ، ބަލީގެ އަލާމާތް ހުންނަ މީހުންނާއި ބަލިޖެހުމުން ނުރައްކާ ވެދާނެ މީހުންނާއި އެފަދަ މީހުންނާއި އެކުގައި އުޅޭ މީހުންނާއި ގިނަ މީހުން އެއްތަންވާ ތަންތަނާއި ހާލަތްތަކުގައި މާސްކު އެޅުމަކީ އެދެވިގެންވާ ކަމަށެވެ.
