ކޮވިޑް-19އާ ގުޅިގެން އިއުލާނުކޮށްފައިވާ އާއްމު ސިއްހަތުގެ ކުއްލި ނުރައްކަލުގެ ހާލަތު ނިމުމަކަށް އައި ނަމަވެސް އޯޑިއޯ އަދި ވީޑިއޯ މެދުވެރިކޮށް ކޯޓުތަކުގައި ޝަރީއަތްތައް ކުރިއަށްގެންދެވޭނެ ކަމަށް ސުޕްރީމް ކޯޓުން ވިިދާޅުވެއްޖެއެވެ.
ކޮވިޑްގެ ހާލަތުގައި ކޯޓުތަކުގައި ޝަރީއަތްތައް ކުރިއަށްގެންގޮސްފައި ވަނީ އޮންލައިން ކޮށެވެ. މިއީ ރާއްޖޭގައި އޮންލައިންކޮށް ޝަރީއަތްތައް ކުރިއަށްގެންދިޔަ ފުރަތަމަ ފަހަރެވެ. މީގެ ސަބަބުން ހެޔޮ ބަދަލުތަކެއް އައި ކަމަށް ސުޕްރީމް ކޯޓުން ވިދާޅުވެއެވެ.
އެ ކޯޓުން ވިދާޅުވީ، ކުއްލި ނުރައްކަލުގެ ހާލަތުގައި ކޯޓުން ފޯރުކޮށްދޭ ހުރިހާ ހިދުމަތްތަކާއި ޝަރީއަތުގެ މަޖިލީސްތައްް ޓެކްނޮލޮޖީގެ ވަސީލަތްތައް މެދުވެރިކޮށް ކުރިއަށް ގެންދިއުމުގެ ސަބަބުން، އަވަސްކަމާއި ފަސޭހަކަމާއެކު، ކުރިއަށް ގެންދެވުނު ކަމަށެވެ. އަދި ހަރަދު ކުޑަ ނިޒާމެއްގެ ތެރެއިން، އަދުލު އިންސާފަށް ވާސިލްވުމުގެ މަގު ފަހިވެ، ހަލުވިކަމާއެކު ޝަރީއަތްތައް ހިންގައި މައްސަލަތައް ނިންމުމަށް މަގުފަހިވެފައިވާކަން ފާހަގަކުރެވިފައިވާ ކަމަށް ސުޕްރީމް ކޯޓުން ވިދާޅުވިއެވެ.
އެހެންކަމުން އޯޑިއޯ އަދި ވީޑިއޯ މެދުވެރިކޮށް ޝަރީއަތް ކުރިއަށް ނުގެންދެވޭނެ ކަމަށް ގަނޫނުގައި ބަޔާންކޮށްފައިވާ ހާލަތްތައް ފިޔަވާ އެހެން ހާލަތްތަކުގައި، އަދުލު އިންސާފުގެ ހަމަތައް ނުގެއްލޭނެ ގޮތެއްގެ މަތިން، އޯޑިއޯ އަދި ވީޑިއޯ ކޮންފަރެންސިންގ މެދުވެރިކޮށް މައްސަލަތަކުގެ އަޑުއެހުންތައް ކުރިއަށް ގެންދިއުމާއި، އަޑުއެހުންތަކާއި ގުޅޭ އިދާރީ އަދި އިޖްރާއީ ކަންކަން ކުރިއަށް ގެންދިއުމުގެ އިހްތިޔާރު މައްސަލަ ބަލާ ފަނޑިޔާރަށް ލިބިގެންވާ ކަމަށް ކޯޓުން ވިދާޅުވެފައި ވެއެވެ.
