އއ.ބޮޑުފޮޅުދޫ އާރުބީޖީ ސްޕޯރޓްސް ކުލަބުގެ އަންހެން ވޮލީޓީމާއި ކުނބުރުދޫ ފެހިވިނަ ސްޕޯރޓްސް ކުލަބުގެ އަންހެން ވޮލީޓީމް ބައްދަލު ކުރި އެކުވެރިކަމުގެ ވޮލީ މެޗް 3-1 ސެޓުން އާރުބީޖީ ގެ އަންހެން ޓީމް ކާމިޔާބު ކޮށްފިއެވެ.
އާރުބީޖީ އިން މައުލޫމާތު ހިއްސާކުރައްވަމުން އެކުލަބުގެ ރައީސް ނަސީމް ވިދާޅުވީ މި މެޗަކީ ފެހިވިނަ ސްޕޯޓްސް ކުލަބާއި ގުޅުން ބަދަހި ކުރުމުގެ މަގްސަދުގައި ކުޅެވުނު މެޗެއް ކަމަށެވެ.
މިމެޗު ކުޅެފައިވަނީ ބޮޑުފޮޅަދޫ ވޮލީ ކޯޓުގައިކަން ފާހަގަ ކުރަމުން ނަސީމް ވިދާޅުވީ މެޗުގެ ފުރަތަމަ ސެޓު 17-25 އިން ފެހިވިނަ ކާމިޔާބުކުރި އިރު 2 ވަނަ ސެޓު 21-25 ފެހިވިނަ ވަނީ ކާމިޔާބު ކޮށްފައިވެ. ފޯރިގަދަ ކުޅުމެއް ދެޓީމުގެ ފަރާތުން ފެނިގެން ދިޔަ މިމެޗުގައި ފުރަތަމަ 2 ސެޓުގައި އާރުބީޖީ ޓީމްގެ ކުޅުން އެހެން މެޗުތަކާއި އަޅާބަލާއިރު ކުޅުން ދަށްކަމަށް ރައީސް ވަނީ ފާހަގަ ކޮށްފައެވެ. އަދި ސަބަބެއް ކަމުގައި ނަސީމް ވިދާޅުވީ ޓީމް ޕްރެކްޓިސް ކުރަމުން މިހާރު އަންނަނީ ވޮލީގެ އެންމެ ފަހުގެ ފޯމޭޝަނަށް ކަމަށާއި އަދި ޓީމަށް އެފޯމޭޝަން ގައި ކުޅުމަށް އުނދަގޫ ތަކެއް ހުރުމުން ކަމަށް ގަބޫލުކުރެވޭ ކަމަށެވެ. މިމެޗުގެ 3 ވަނަ ސެޓުން ފެށިގެން އާރުބީޖީ ޓީމުން ކުޅުން ރަނގަޅުކޮށް 25-23 އިން 3 ވަނަ ސެޓު ކާމިޔާބުކޮށް 4 ވަނަ ސެޓު ވެސް 18-25 އިން ސެޓު ކާމިޔާބުކޮށް މެޗުން ވަނީ މޮޅުވެފަ އެވެ.
އާރުބީޖީ އަދި ފެހިވިނަ ބައްދަލު ކުރި މެޗު ފެށުމުގެ ކުރިން އެކުލަބުން ވަނީ ހާއްސަ ހަރަކާތެއްވެސް ވޮލީ ކޯޓުގައި ގެންގޮސްފައެވެ. އެކަމާއި ބެހޭގޮތުން މައުލޫމާތު ދެއްވަމުން އާރުބީޖީގެ ރައީސް ވިދާޅުވީ އާރުބީޖީ އަކީ ފެށުނީއްސުރެ ކުޅިވަރުގެ އިތުރުން ގިނަ ހަރަކާތްތަކެއް ހިންގާ ކުލަބެއްކަމަށާއި ރަށުގައި ބަލި ހާލަތުގެ ގޮތުން އެހީތެރިކަމަށް ބޭނުންވެފައިވާ ފަރާތްތަކަށް އެހީތެރިވެދެމުން އަންނަކަމަށާއި، އެގޮތުން މި ހަރަކާތަކީ އާރުބީޖީގެ ދެ މެމްބަރުންނަށް އެހީތެރިކަން ފޯރުކޮށްދިނުމަށް ހިންގުނު ފަންޑްރައިޒިން ހަރަކާތެއްކަމަށެވެ.
އެގޮތުން މިހަރަކާތް ކުރިއަށް ގެންގޮސްފައިވަނީ ބޮޑުފޮޅަދޫ ސްކޫލު އަދި އާރުބީޖީ ގުޅިގެންކަމަށް ރައީސް ވިދާޅުވި އެވެ. މި ހަރަކާތުގައި ފަންޑް ފޮއްޓެއް ވޮލީކޯޓް ސަރަހައްދުގައި ބެހެއްޓިފައި ވާއިރު ސްކޫލްގެ މުވައްޒަފުން އިސްވެ ތިބެ ކެންޓީނެއްގެ ހިދުމަތް ފޯރުކޮށްދީފައިވެއެވެ. މި ހަރަކާތުގައި ގިނަ ރައްޔިތުންތަކެއް ބައިވެރިވެ އެހީތެރިކަން ފޯރުކޮށްދީފައިވެއެވެ.
ހަރަކާތް ފައްޓަވާ ދެއްވައި ވޮލީމެޗު ޝަރަފުވެރި ކޮށްދެއްވީ އއ.މަތިވެރީ ޑަބްލިއު.ޑީ.ސީގެ ރައީސާ މުސްލިމާ އެވެ. އާރުބީޖީގެ ރައީސް ވިދާޅުވީ މުސްލިމާ އަކީ އާރުބީޖީ ސްޕޯޓްސް ކްލަބަށް މުހިންމު ދައުރެއް އަދާކޮށްދޭ ފަރާތެއް ކަމަށާއި ކުލަބުން އެދުނު ކޮންމެކަމެއް ފަސްޖެހުމެއްނެތި ސާބިތުކަމާއެކު ކޮށްދީ އެކިއެކި ގޮތްގޮތުން އެހީތެރިކަން ފޯރުކޮށްދޭ ފަރާތެއް ކަމަށެވެ. ިއަދި މުސްލިމާ ވެދެއްވާ އެހީތެރިކަމާއި މިކުލަބަށް ކޮށްދޭ މަސައްކަތުގެ އަގު ވަޒަންކޮށް 2020 ވަނަ އަހަރުގެ އެކުލަބުގެ ފުރަތަމަ އަހަރީ އާންމު ޖަލްސާގައި ވަނީ ހާއްސަ ހަނދާނީ ފިލައެއް ދީފަ އެވެ.
