ޓެކާރސް މައިލޯ ޗެމްޕިއަންޝިޕް މޯލްޑިވްސް ކަޕްގެ އއ އަތޮޅުގެ ޗެމްޕިއަން ކަން އއ. ބޮޑުފޮޅުދޫ އިން ހޯދައިފިއެވެ.
ރޭ ކުޅުނު އއ. އަތޮޅުގެ އަތޮޅު ފައިނަލް މެޗުގައި ބޮޑުފޮޅުދޫ ނުކުމެފައިވަނީ އއ.ތޮއްޑޫއާއި ދެކޮޅަށެވެ. ފޯރިގަދަ ކުޅުމެއް ފެނިގެންދިޔަ މިމެޗުގައި ފުރަތަމަ ލަނޑުޖަހައި ލީޑް ނަގައިދީފައިވަނީ ބޮޑުފޮޅުދޫއިންނެވެ. އަދި ބޮޑުފޮޅުދޫ އިން ދެވަނަ ލަނޑު ޖަހައި ލީޑް ފުޅާކޮށްފައިވަނިކޮށް ތޮއްޑޫ ޓީމުން އެޓީމުގެ ފުރަތަމަ ލަނޑު ޖަހާފައިވަނީވެސް އިތުރު ވަގުތުގައެވެ. އަދި ދެވަނަ ލަނޑު ޖަހައި ނަތީޖާ ހަމަހަމަކޮށްފައިވަނީ ވެސް އިތުރު ވަގުތުގެ ތެރޭގައެވެ.
މެޗު ނިމުނު އިރު ދެޓީމުންވެސް ވަނީ 2 ގޯލް ޖަހާފައެވެ. އެހެންކަމުން މެޗުގެ ނަތީޖާ ނެރެފައިވަނީ ޕެނަލްޓީ ޖަހައިގެންނެވެ. ޕެނަލްޓީ ޖަހައިގެން ބޮޑުފޮޅުދޫ މެޗު ކާމިޔާބު ކުރީ 9-8 ގެ ނަތީޖާއަކުންނެވެ. މެޗުގެ މޮޅު ކުޅުންތެރިއަކަށް ހޮވިފައިވަނީ ބޮޑުފޮޅުދޫ ޓީމްގެ ޖޯޒީ ނަމްބަރު 9 ޖާދުﷲ އަހުމަދެވެ. އއ. އަތޮޅުގެ އެންމެ ގިނަ ލަނޑު ޖެހި ކުޅުންތެރިޔަކަށް ހޮވުނީ ބޮޑުފޮޅުދޫ ޓީމުގެ ޖޯޒީ ނަންބަރ 7 މުހައްމަދު ޝިރުހާނެވެ.
