އިންޑިއާ އިން އައްޑޫ ސިޓީގެ ހިތަދޫ ސްކޫލަށް 25 ކޮމްޕިއުޓަރު ހަދިޔާކޮށްފި އެވެ.
ހިތަދޫ ސްކޫލަށް ކޮމްޕިއުޓަރު ސިސްޓަމްތައް ހަދިޔާކުރީ އައްޑޫ މަގު ހެދުމުގެ މަސައްކަތްކުރާ އިންޑިއާގެ ކުންފުނި، އެފްކޯންސްގެ ފަރާތުންނެވެ. މި ތަކެއްޗާ ހިތަދޫ ސްކޫލްގެ ފަރާތުން ހަވާލުވީ އެ ސްކޫލްގެ ޕްރިންސިޕަލް ޑރ. އާސިޔަތު މުހައްމަދުދީދީ އެވެ. އެފްކޯންސް އަކީ އައްޑޫގެ މަގު ހެދުމުގެ ބިޔަ ޕްރޮޖެކްޓު ހިންގާ އިންޑިއާގެ ކުންފުންޏެވެ.
މިއީ މިދިޔަ އަހަރުގެ ޑިސެމްބަރު މަހު އިންޑިއާ އިން ރާއްޖެ އަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރް އައްޑު އަށް ކުރެއްވި ދަތުރުފުޅުގައި ހިތަދޫ ސްކޫލްގެ ފަރާތުން އެ ސްކޫލްގެ ކޮމްޕިއުޓާ ލެބަށް އެހީތެރިކަން ފޯރުކޮށް ދިނުމަށް ދެންނެވުމުން ހަދިޔާކުރި ތަކެއްޗެވެ.
އެގޮތުން އެ ފަހަރު އެ ސްކޫލްގެ ފަރާތުން ވަނީ އިންޑިއާ ސަފީރަށް އެކަމާ ގުޅޭ ޕްރޮޕޯސަލެއް ހުށަހަޅައިފަ އެވެ.
މީގެ އިތުރުން އިންޑިއާގެ ހާރިޖީ ވަޒީރު ޑރ. ސުބްރަމާނިއަމް ޖައިޝަންކަރު އައްޑު އަށް ކުރެއްވި ދަތުރުފުޅުގައި ވަނީ ހިތަދޫ ސްކޫލް ޕްރިންސިޕަލް ޓީޗަރުން އަދި ދަރިވަރުންނާ އެކު ވެސް ވަގުތުކޮޅެއް ހޭދަކުރައްވައިފަ އެވެ.
