ސްރީލަންކާގެ ޔޫތު އެންޑް ސްޕޯޓްސް މިނިސްޓަރު ނަމާލް ރާޖަޕަކްސަ ކެބިނެޓުގައި އަދާކުރަމުންދިޔަ ހުރިހާ މަގާމުތަކަކުން އިސްތިއުފާ ދެއްވާފައިވާ ކަމަށް ލަންކާގެ މީޑިއާ ރިޕޯޓުތައް ބުނެފި އެވެ.
ސްޕޯޓްސް މިނިސްޓްރީގެ އިތުރުން ނަމާލް ގެންދެވީ މިނިސްޓްރީ އޮފް ޑިވެލޮޕްމެންޓް ކޯޑިނޭޝަން އެންޑް މޮނީޓަރިން އަދި ޑިޖިޓަލް ޓެކްނޮލޮޖީ އެންޑް އެންޓަޕްރައިސް މިނިސްޓްރީގެ ސްޓޭޓު މިނިސްޓަރުކަން އަދާކުރައްވަމުންނެވެ.
ލަންކާގެ މީޑީއާ ރިޕޯޓުތައް ބުނާގޮތުން މި މަގާމުތަކުން އިސްތިއުފާ ދެއްވިކަން ނަމާލް ހާމަކުރެއްވީ މިހާރު ކުރިއަށްދާ ލަންކާ ސަރުކާރުގެ ކެބިނެޓް ބައްދަލުވުމުގަ އެވެ.
ނަމާލް ކެބިނެޓް މަގާމުތަކުން އިސްތިއުފާ ދެއްވިއިރު އޭނާގެ އަނބިކަނބަލުން ލިމިނީ ރާޖަކަޕްސަ ލަންކާ ދޫކޮށް މިއަދު ހެނދުނު ގޮސްފައިވާ ކަމަށް ރިޕޯޓުތައް ބުނެ އެވެ.
ނަމާލްގެ އިތުރުން ވެސް ރާޖަޕަކްސަ އާއިލާ އަށް ނިސްބަތްވާ ގިނަ ބޭފުޅުންތަކަކަށް ވަނީ ލަންކާ ސަރުކާރުން މަގާމުތައް ދީފަ އެވެ. އެގޮތުން އެގައުމުގެ ފިނޭންސް މިނިސްޓަރުގެ މަގާމުގައި ހުންނެވީ ލަންކާގެ ރައީސާއި ބޮޑުވަޒީރުގެ ކޮއްކޮ ބަސިލް ރާޖަޕަކްސަ އެވެ.
މީގެއިތުރުން ލަންކާގެ ރައީސް ގޯތާބަޔަ އާއި ބޮޑުވަޒީރު މަހިންދަގެ ދޮށީ ބޭބޭފުޅު ޗަމަލް ރާޖަޕަކްސަ އަށް ވަނީ އިރިގޭޝަން މިނިސްޓަރުކަމުގެ އިތުރުން ސްޓޭޓް މިނިސްޓަރ އޮފް އިންޓާނަލް ޑިފެންސް އަދި ޑިޒާސްޓާ މެނޭޖްމަންޓުގެ މަސްއޫލިއްޔަތު ހަވާލުކޮށްފަ އެވެ. އަދި ޗަމަލްގެ ދަރިކަލުން ޝަޝީންދްރާ ރާޖަޕަކްސަ ގެންދަވަނީ ދަނޑުވެރިކަމާ ބެހޭ ސްޓޭޓް މިނިސްޓަރުކަން ކުރައްވަމުންނެވެ.
އިގުތިސާދީ ގޮތުން ގައުމުގެ ހާލަތު ވަރަށް ބޮޑަށް ދަށްވެ، ލަންކާގެ އާންމު ރައްޔިތުން މަގުމައްޗަަށް ނުކުމެ ސަރުކާރާ ދެކޮޅަށް އަންނަނީ މުޒާހަރާތައް ބާއްވަމުންނެވެ. މުޒާހަރާތަަކާ ގުޅިގެން ލަންކާ ސަރުކާރުން ރޭގެ ވަގުތެއްގައި ވަނީ އެގައުމުގައި ސޯޝަލް މީޑިއާގެ ހުރިހާ ޕްލެޓްފޯމުތަކަށް ނުވަދެވޭ ގޮތް ވެސް ހަދާފަ އެވެ. ނަމަވެސް މިއަދު މެންދުރު އަލުން ވަނީ ސޯޝަލް މީޑިއާ އަށް ވަދެވޭ ގޮތް ހަދާފަ އެވެ
