“އެސްޖެހި ގަނޑުވަރު” ހުޅުމާލޭ ދެވަނަ ފިޔަވަށްސަށް ބަދަލުކުރުމުގެ މަސައްކަތް ހައުސިންގ ޑިވެލޮޕްމަންޓް ކޯޕަރޭޝަން އެޗް.ޑީ.ސީން ފަށައިފިއެވެ.
އެޗްޑީސީން މިއަދު ބުނީ، ރާއްޖޭގެ އާސާރީ އަދި ވަޑާމުގެ ފަންނުވެރިކަން އެންމެ ފުރިހަމަ އަށް ފެންނަން ހުރި އެސްޖެހި ގަނޑުވަރު އަލުން ރޭވުމުގެ މަސައްކަތް ކުރަމުން އަންނަނީ އޭގެ އަސްލު ނުގެއްލޭ ގޮތަށް ކަމަށެވެ.
އެސްޖެހި ގަނޑުވަރު އަލުން ރާވަމުން އަންނަ މަންޒަރުތައް ފެންނަ ފޮޓޯތަކެއް އެޗްޑީސީން އާންމުކޮށްފައިވެ އެވެ.
އެސްޖެހިގެ ހުންނަތަން މިވަގުތު ބޭނުން ކުރަނީ ކެފޭއެއްގެ ގޮތުގައެވެ. އެތަނުގެ ތާރީހުގެ މުހިއްމުކަމަށް ބޮޑު ސަމާލުކަމެއް ދީފައި ނުވާ ކަމަށް އެޗްޑީސީއިން ބުނެއެވެ.
ރާއްޖޭގެ ތާރީޚު ދިރާސާކުރައްވާ ބޭފުޅުން ވިދާޅުވާގޮތުގައި އެސްޖެހި ގަނޑުވަރު ބިނާކުރެވުނީ 19 ވަނަ ޤަރުނުގެ މެދުތެރޭގައެވެ. މި ގަނޑުވަރު ބިނާކުރުމުގައި ބޭނުންކޮށްފައި ހުރީ އެ ޒަމާނުގައި ލިބެންހުރި އެންމެ މޮޅު ލަކުޑިންނެވެ. އަދި މި ލަކުޑީގައި އަޅާފައިވާ ކުރެހުންތަކަކީ އެ ޒަމާނުގައި އުރިގެން ރާއްޖެއަށް ލައްގާފައިހުރި ބޯޓުފަހަރުގައި ހުރި ކުރެހުންތަކަށް ބަލައި، އެއިން ކޮންމެވެސް ވަރަކަށް ނަކަލުކޮށްގެން އެޅިފައިވާ ކުރެހުންތަކެއްކަމަށް ބުނެއުޅެއެވެ.
އެސްޖެހިގެއަކީ މާލޭގައި ހުރި އާސާރީ ތަންތަނުގެ ތެރެއިން ފާހަގަކޮށްލެވޭ ތަނެކެވެ. އެ ޒަމާނުގެ އެހެން ބިނާއެއް މާލޭގައި މިހާރު ނެތުމުން، މިތަންވަނީ ރާއްޖޭގެ ސަގާފީ ތަރިކައިގެ ދަފްތަރުގައި ހިމަނާފައެވެ.
އެޗް.ޑީ.ސީން މީގެ ކުރިން ވިދާޅުވެފައިވަނީ އެސްޖެހި ގަނޑުވަރު އަލުން ހުޅުވުމަށް ހަމަޖެހިފައިވަނީ ފަންނުވެރިންގެ ޚިޔާލުތައް ފޯރުކޮށްދޭ ގެލަރީއެއްގެ ގޮތުގައި ކަމަށެވެ. އަދި އެސްޖެހިގޭގެ ސަގާފީ ތަރިކަ ތަޖުރިބާކޮށްލުމުގެ ފުރުސަތު އާންމު ރައްޔިތުންނާއި ފަތުރުވެރިންނަށް ލިބިގެންދާނެ ކަމަށްވެސް އެޗް.ޑީ.ސީން ބުނެފައިވެއެވެ.
