ފަނޑިޔާރުންގެ ގާނޫނާ ޚިލާފަށް ޖަމިއްޔާއެއް އުފައްދާ، އެ ޖަމިއްޔާގައި ހަރަކާތްތެރި ވެފައިވާތީ ހދ އަތޮޅުގެ އިސް މެޖިސްޓްރޭޓް އަލީ އާދަމަށް ޖޭއެސްސީ އިން ސުލޫކީ ފިޔަވަޅު އަޅައިފިއެވެ
ޖޭއެސްސީން މިއަދު ބުނީ އޭނާ އުފެއްދި ޖަމިއްޔާއިން ކުޅުދުއްފުށީގައި ހިންގި ހަރަކާތެއްގައި އަލީ އާދަމް ބައިވެރިވި ކަމަށާއި، އެ ހަރަކާތަކީ ސިޔާސީ ހަރަކާތެއްގެ ގޮތުގައި އާންމުން ދެކުމުގެ ފުރުސަތު އެބައޮތް ކަމަށެވެ.
އަދި، އެ ހަރަކާތް އިޝްތިހާރުކުރުމަށް އަލީ އާދަމްގެ ފޭސްބުކުގައި ހިއްސާކޮށްފައިވާ ޝުއޫރުތަކަކީ ވެސް ސިޔާސީ ޝުއޫރުތަކެއް ކަމަށް އާންމުން ދެކުމުގެ ފުރުސަތު އެބައޮތްކަމަށް ޖޭއެސްސީން ބުންޏެވެ.
މީގެ އިތުރުން، ކޯޓުން ވަރިކޮށްދިން ކައިވެންޏެއް ރުޖޫއަކޮށްދިނުމުގައި ބަލަން ޖެހޭ ވަރަށް ބަލާފައި ނުވުމުގެ މައްސަލައެއް ވެސް އޭނާގެ މައްޗަށް ޖޭއެސްސީން ހުށަހަޅާފައި ވެއެވެ.
ސުލޫކީ ފިޔަވަޅެއްގެ ގޮތުން ޖޭއެސްސީން ނިންމާފައި ވަނީ މުސާރައާއި އިނާޔާތް ނުލިބޭ ގޮތަށް ދެ ހަފްތާގެ މުއްދަތަށް ސަސްޕެންޑު ކުރުމަށެވެ.
މި މުއްދަތުގައި ހދ އަތޮޅުގެ އިސް މެޖިސްޓްރޭޓުގެ މަސްއޫލިއްޔަތު އަދާކުރައްވާނީ ކުޅުދުއްފުށީ ކޯޓުގެ މެޖިސްޓްރޭޓް މުޙައްމަދު އިސްމާއީލެވެ.
