މިވަގުތު ވެރިކަންކުރާ މައި ޕާޓީ، އެމްޑީޕީއަށް އެންމެ ރަނގަޅުގޮތަކީ ފެތެމުންދާ ސަރުކާރާއެކު ނުފެތުން ކަމަށް ވިދާޅުވެ އެޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ސަރުކާރާ ދެކޮޅަށް ވާހަކަދައްކަވައިފިއެވެ.
މިފަހަކަށް އައިސް އެމްޑީޕީގެ ތެރޭގައި ރައީސް އިބްރާހީމް މުހައްމަދު ސާލިހްގެ ފެކްޝަނަކާއި، ރައީސް ނަޝީދަށް ތާއީދުކުރައްވާ މެމްބަރުންގެ ފެކްޝަނެއް އުފެދިފައިވާއިރު، މެމްބަރުންގެ މެދުގައި ވާދަވެރިކަން ބޮޑުވެ ބަހުގެ ހަމަލާތައް ބަދަލުކުރުން ވަނީ އިތުރުވެފައެވެ.
މީގެކުރިންވެސް ރައީސް ނަޝީދުގެ ފާޑުކިޔުން ސަރުކާރަށް އަމާޒުވެފައިވާއިރު، އެމްޑީޕީގެ ގައުމީ މަޖިލީހުގެ ވަޓްސްއެޕް ގްރޫޕަށް ފޮނުވި މެސެޖެއްގައި ވިދާޅުވީ، މިވަގުތު އެމްޑީޕީ އަށް ރަނގަޅު ގޮތަކީ ސަރުކާރާއެކީ އެ ޕާޓީ ނުފެތުން ކަމަށެވެ. އަދި، މިސަރުކާރަކީ އެމްޑީޕީގެ އެކަނި ސަރުކާރެއް ނޫން ކަމަށާއި މެމްބަރުން އެދޭ ގޮތަށް ޕާޓީގެ ވައުދުތައް ނުފުއްދޭ ކަމަށްވެސް އެމަނިކުފާނު ވިދާޅުވިއެވެ.
އެމްޑީޕީގެ ޗެއާޕާސަންގެ އިންތިޚާބުގެ ކެމްޕެއިން ފޯރި ގަދަވެ، ރައީސް ނަޝީދަށް ތާއިދު ކުރާ މެންބަރުންނާއި ރައީސް ޞާލިހަށް ތާއިދު ކުރާ މެންބަރުންގެ މެދުގައި ބަހުގެ ހަމަލާތައް ހޫނުވެފައިވާ މި ދަނޑިވަޅުގައި، އެމްޑީޕީއަށް “މާ ގިނަ ގޯސް” ހެދިއްޖެ ކަމަށްވެސް ރައީސް ނަޝީދު ވަނީ ދާދިފަހުން ވިދާޅުވެފައެވެ.
ސަރުކާރުން ކުރަމުން އަންނަ އެކި ކަންކަމަށް ސީދާގޮތުންނާއި ނުސީދާގޮތުން މިފަހަކަށް އައިސް ރައީސް ނަޝީދުގެ ފާޑުކިޔުން އަމާޒުވާކަން ފާހަގަކޮށްލެވެއެވެ.
ރައީސް ނަޝީދަށް ތާއީދުކުރައްވާ އެމްޑީޕީގެ މަޖިލިސް މެމްބަރުންވެސް ސަރުކާރަށް ފާޑު ވިދާޅުވެ އިދިކޮޅުން ހުށަހަޅާ ސަރުކާރާ ދެކޮޅު ބައެއް ގަރާރުތަކަށް ތާއީދުކުރެއެވެ.
އެމްޑީޕީގެ ޗެއާޕާސަން އިންތިޚާބުގެ ފޯރިއާއެކު ޕާޓީ ތެރޭގައި ދެ ފެކްޝަން އުފެދިފައިވާއިރު، އިންތިޚާބުގައި ވާދަކުރައްވަނީ ރައީސް ނަޝީދުގެ ފެކްޝަނުން ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ އާއި ރައީސް ޞާލިހުގެ ފެކްޝަނުން އެކޮނޮމިކް މިނިސްޓަރ ފައްޔާޒު އިސްމާއިލެވެ.
