އއ.ބޮޑުފޮޅުދޫ އާރުބީޖީ ސްޕޯރޓްސް ކުލަބުން 2021 ވަނަ އަހަރުގެ ބަރަކާތްތެރި ރަމަޟާން މަހުން ފެށިގެން ބޮޑުފޮޅުދޫއަށް ހުޅުވާލައިގެން ބާއްވަމުން އަންނަ އައްނޫރު ގުރުއާން މުބާރާތުގެ 2 ވަނަ މުބާރާތް އިއްޔެ ފަށައިފިއެވެ.
އެ ކުލަބުން މައުލޫމާތު ދިންގޮތުގައި މި މުބާރާތަކީ ކުޅިވަރުގެ އިތުރުން އެ ކުލަބުން އެންމެ އިސްކަމެއް ދީގެން ކުރިޔަށްގެދާ އެއް މުބާރާތް ކަމަށާއި ،މަގްސަދަކީ ރަށުގައި ހުނަރުވެރި ރީތިކޮށް ގުރުއާން ކިޔަވަން އެގޭ ގުރުއާނަށް ލޯބިކުރާ ގިނަ ދަރިންތަކެށް އުފެއްދުން ކަމަށެވެ.
މިއަހަރުގެ މުބާރާތް ކުރިއަށް ގެންދަނީ ބޮޑުފޮޅުދޫ ކައުންސިލް އާއި ގުޅިގެން ކައުންސިލް އިން ފޯރުކޮށްދިން މާލީ އެހީތެރިކަމާއި އެކުގައެވެ. އަދި މިއަހަރުވެސް މުބާރާތް ކުރިއަށް ގެންދަނީ ރަށުގެ ގިނަ ފަރާތްތަކެއްގެ ދީލަތި އެހީތެރިކަމާއި އެކުގައި ކަމަށާއި، މުބާރާތަށް އެހީތެރިކަން ފޯރުކޮށްދެއްވި ހުރިހާ ފަރާތްތަކަށް ޝުކުރު އަދާކުރާ ކަމަށެވެ.
މުބާރާތް ފެށުމުގެ ރަސްމިއްޔާތުގައި އާރުބީޖީ ސްޕޯރޓްސް ކުލަބުގެ ހިންގާ ކޮމިޓީގެ މެމްބަރުން ވަނީ ބައިވެރިވެފައެވެ.
އެކި އުމުރު ފުރާތަކަށް ބަހާލައިގެން ދެ ދަންފަޅިއަކަށް މުބާރާތުގެ ކިޔެވުން ކުރިއަށް ގެންދެވޭނެ ކަމަށް އެކުލަބުން ވަނީ މައުލޫމާތު ދީފައެވެ. މިއަހަރުގެ މުބާރާތް ފަށާފައި މިވަނީ މިދިޔަ އަހަރާއި ހިލާފަށް ބައިވެރިންގެ މެދުގައި އޯޑިޝަންއެއް ބޭއްވުމަށް ފަހު އޯޑިޝަން އިން ފާސްވި ބައިވެރިންނާއި އެކުގައެވެ.
މިއަހަރުގެ މުބާރާތުން ވެސް ވަނަވަނައަށް ހޮވޭ ފަރާތްތަކަށް ސެޓްފިކެޓްގެ އިތުރުން ރަގަޅު އިނާމްތައް ދެވިގެންދާނެ ކަމަށް އާރުބީޖީއިން ބުނެއެވެ.
މުބާރާތާއި ބެހޭގޮތުން އިތުރަށް މައުލޫމާތު ހިއްސާކުރަމުން އެކުލަބުން ބުނީ މުބާރާތުން ވަނަވަނައަށް ހޮވޭ ފަރާތްތަކަށް އިނާމު ހުށައެޅުމުގެ ފުރުސަތު އޭޕްރިލް 30 ވަނަ ދުވަހާއި ހަމައަށް ހުޅުވާލާފައިވާ ކަމަށާއި ، އިނާމު ހުށައަޅަން ބޭނުންވާ ފަރާތްތަކުން ކުލަބުގެ ސެކެރެޓަރީ މުސްތަފާ އަހްމަދު އާއި (9942620) ގުޅުއްވައިގެން ކުރިއަށް ގެންދިއުމަށް އެދޭ ކަމަށެވެ.
އަދި އަންނަ އަހަރުވެސް މިއަށްވުރެ ފެންވަރު ރަނގަޅުކޮށް މިމުބާރާތް ކުރިއަށް ގެންދިއުމުގެ ވިސްނުން އެބަހުރިކަމަށާއި އަންނަ އަހަރުގެ މުބާރާތް ސްޕޮންސަރ ކުރަން ބޭނުންވާ ފަރާތްތަކަށް އެފުރުސަތު ވެސް ހުޅުވާލެވިފައިވާ ކަމަށެވެ.
އާރުބީޖީއިން ބުނީ މިފަދަ އިތުރު ހަރަކާތްތައް މިއަހަރުގެ އަހަރީ ޕްލޭންގައި ހިމަނާފައިވާނެ ކަމަށާއި، އެހެންނަމަވެސް ހަރަކާތްތައް ހިންގުމުގައި މާލީގޮތުން ބޮޑެތި ދަތިތަކެށް އެބަހުރި ކަމަށާއި، ކުލަބުތަކަށް ހަރަކާތްތެރިވެވޭނެ މާލީ އެހީތެރިކަން ލިބޭނެ ގޮތެއް ކަމާއި ގުޅުންހުރި މުއަށްސަސާ ތަކުން ހޯދައި ދިނުމާއި މެދު ވިސްނަންޖެހޭކަމަށް ގަބޫލުކުރާކަމަށެވެ.
އާރުބީޖީ ސްޕޯރޓްސް ކުލަބަކީ އއ. ބޮޑުފޮޅުދޫ ގައި ހަރަކާތްތެރިވާ ފާހަގަ ކޮށްލެވޭ އެތައް ހަރަކާތްތަކެށް ހިންގަމުން އަންނަ އއ.އަތޮޅުގެ އިތުރުން މުޅި ރާއްޖޭގެ މަގްބޫލްކަން ކުޑަ ދުވަސް ކޮޅެއްގެ ތެރޭގައި ހޯދާފައިވާ ހިންގުންތެރި ކުލަބެއްކަން ފާހަގަ ކޮށްލެވެއެވެ.
