ށ.ފުނަދޫ ސްކޫލް އިންޓަރ ހައުސް 21 ވަނަ ޤުރުއާން މުބާރާތް ކާމިޔާބު ކަމާއެކު ނިންމާލައިފިއެވެ.
މި މަހުގެ 23 ން 26 ވަނަދުވަހާއި ހަމައަށް ކުރިއަށްގެންދިޔަ މި ޤުރުއާން މުބާރާތުގައި 150 ދަރިވަރުން ބައިވެރިވެ 143 ދަރިވަރުން ވަނީ ކިޔަވާފައެވެ.
މި މުބާރާތާ ބެހޭގޮތުން ގޮށްކޮޅަށް މައުލޫމާތު ދެއްވަމުން ފުނަދޫ ސްކޫލްގެ މުހައްމަދު ހަސަން ވިދާޅުވީ މުބާރާތަށް ކުދިން ނެގުމުގައި ފައުންޑޭޝަން އަދި ކީ ސްޓޭޖް 1 އަދި 2 ގެ އޮޑިޝަނެއް ބޭއްވިކަމަށާއި އެ އޮޑިޝަނުން ފާސްވި ދަރިވަރުން ޤުރުއާން މުބާރާތުގައި ބައިވެރިވެ ކިޔަވާފައިވާކަމަށެވެ. ދެން ހުރި ކީ ސްޓޭޖްތަކުން އޮޑިޝަނަކާ ނުލައި ބައިވެރި ވެވޭގޮތަށް ކުރިއަށް ގެންދިޔަ ކަމަށްވެސް މުހައްމަދު ހަސަން ވިދާޅުވިއެވެ.
މި މުބާރާތުގެ ނިންމުމުގެ ރަސްމިއްޔާތު މެއި މަހުގެ ކުރީ ކޮޅު ބާއްވަން މިހާރު ތާވަލް ކޮށްފައިވާއިރު މުބާރާތުގެ ވަނަތަކަށް އިނާމު ހުށައަޅަން ފުނަދޫ ސްކޫލުން ވަނީ އާންމުންނަށް ހުޅުވާލާފައެވެ.
އެ ސްކޫލުން ބުނީ އިނާމު ހުށައަޅަން ބޭނުންވާ ފަރާތްތަކުން މި މަހުގެ 28 ވަނަ ދުވަހު ރަސްމީ ގަނޑި ނިމުމުގެކުރިން އެ ސްކޫލް ނަންބަރު 6540540 ގުޅުއްވާ ނުވަތަ އެ ސްކޫލަށް ދުރުވެ އެކަންތައް ނިންމެވުމަށް އެދޭކަމަށެވެ.
