ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ޓެރަރިސްޓު ހަމަލާގެ ތަހުގީގު ކުރިއަށް ގެންދިޔައީ ބައިނަލްއަގުވާމީ ބެސްޓް ޕްރެކްޓިސްއާ އެއްގޮތަށް ކަމަށް އެ ހަމަލާގެ ތަހުގީގު ކުރިއަށް ގެންދާ ގޮތް ބެލުމަށް ރައީސް އިބްރާހިމް މުހައްމަދު ސޯލިހު އައްޔަންކުރައްވާފައިވާ މަންދޫބު އައްބާސް ފާއިޒް މިއަދު ވިދާޅުވެއްޖެ އެވެ.
ނަޝީދު އަވަހާރަކޮށްލަން އުޅުނީ މެއި 6، 2021ގެ އިރާކޮޅު އެމަނިކުފާނު ދިރިއުޅުއްވަމުން ގެންދެވި އާއިލީ ގެ، ގ. ކެނެރީގެއިން ނުކުމެވަޑައިގެން މަޖީދީމަގުގައި އޮތް ކާރުކޮޅަށް އަރައިވަޑައިގަންނަވަނިކޮށް، އެ ސަރަހައްދުގައި ބަހައްޓާފައި ހުރި ސައިކަލެއްގައި އައިއީޑީއެއް ގޮއްވާލައިގެންނެވެ.
އެ ހަމަލާއަށް މިއަދު އަހަރެއް ފުރިފައިވާ އިރު، އައްބާސް އާންމުކުރެއްވި ބަޔާނެއްގައި ވިދާޅުވި ގޮތުގައި، ޓެރަރިސްޓު ހަމަލާ ދިނުމާއި އެކަން ކުރި މީހުން ފައިސާ ހަރަދުކުރި ގޮތް ހޯދަން ފުލުހުން ތަހުގީގު ކުރީ، ބެސްޓް ޕްރެކްޓިސްއާ އެއްގޮތަށެވެ. އަދި ހަމަލާ ދިން މީހުންގެ މައްސަލަތައް ޕްރޮސިކިއުޓާ ޖެނެރަލްގެ އޮފީހަށް ފޮނުވީ ވަރުގަދަ ދައުވާއެއް އުފުލޭ ވަރަށް މައުލޫމާތު އެއްކުރުމަށްފަހު ކަމަށްވެސް ވިދާޅުވި އެވެ.
ނަމަވެސް ހަމަލާ ދިނުމުގައި ތުހުމަތުކުރެވޭ މީހުންގެ ބޭރުން ފައިސާގެ އެހީއާއި ހިތްވަރު ނުލިބި އެފަދަ ހަމަލާއެއް ރާވައި އަދި ދިނުމަކީ ނުކުރެވޭނެ ކަމެއްކަމުގެ ސައްހަ ކަންބޮޑުވުންތައް ރާއްޖޭގައި އެބަ އުޅޭ ކަމަށާއި އެހެންކަމުން ހަމަލާގެ ފަހަތުގައިވާ މާލީ މަގުސަދުތައް ދެނެގަތުމަކީ އެ ތަހުގީގުގެ މުހިންމު ބައެއްގެ ގޮތުގައި ދެމި އޮންނަންޖެހޭ ކަމަށް ވިދާޅުވި އެވެ.
“ހަމަލާއާ ގުޅިގެން ހިންގި ތަހުގީގުގައި މާލީ މަގުސަދުތައް ދެނެގަތުމުގައި ކުރިއެރުމެއް ލިބިފައި ނެތުމަކީ ކަންބޮޑުވާ ކަމެއް. އެހެންކަމުން ފަންޑު ކުރި މީހުން ހޯދުމަށް ފުލުހުން އަދިވެސް ތަފުސީލީ އަދި ވަރުގަދަ ތަހުގީގެއް ކުރަންޖެހޭ. މިއީ މުހިންމު ޓާސްކެއް. އެމީހުން ހޯދައި ތަހުގީގު ކާމިޔާބުކުރުމަކީ، ހަމަލާގެ ޝަރީއަތަށްވެސް މުހިންމު އަދި އެފަދަ އިތުރު ހަމަލާއަކުން ސިޔާސީ މީހުންނާއި އާއްމުންނަށް ލިބޭނެ ރައްކާތެރިކަމެއް،” އައްބާސްގެ ބަޔާނުގައިވެ އެވެ.
ހަމަލާދިނުމުގައި ބައިވެރިވި ކަމަށް ތުހުމަތުކުރެވޭ މީހުންގެ ޝަރީއަތްތައް ދިގުލައިގެން ގޮސްފައިވާކަން ފާހަގަކުރައްވައި އޭނާ އިތުރަށް ވިދާޅުވީ، އެއީ ޖިނާއީ އަދުލުގެ ނިޒާމަށް އިތުބާރު ގެއްލުމަށް މެދުވެރިވެދާނެ ފަދަ ކަމެއް ކަމަށެވެ. އަދި އެ ކަންބޮޑުވުންތައް އުއްތަމަ ފަނޑިޔާރާއި ޖޭއެސްސީގެ މެމްބަރުންނާވެސް ހިއްސާކޮށްފައިވާނެ ކަމަށް އައްބާސް ވިދާޅުވި އެވެ.
ޝަރީއަތްތައް ލަސްވާތީ އައްބާސް ވަނީ މިދިޔަ ފެބްރުއަރީ މަހުގެ ތެރޭގައިވެސް އެ ކަންބޮޑުވުން ފާޅުކުރައްވައިފަ އެވެ. އަދި އެކަމުގެ ކަންބޮޑުވުން ނަޝީދުގެ އާއިލާއިންނާއި އެމަނިކުފާނުގެ ގާނޫނީ ވަކީލުންގެ އިތުރުން ރައްޔިތުންގެ މަޖިލީހުންވެސް ވަނީ ފާޅުކޮށްފަ އެވެ.
ހަމަލާއާ ގުޅިގެން ދައުވާ އުފުލާފައިވާ ހަތް މީހުންގެ ތެރެއިން ހުކުމް އިއްވުނީ ބޮން ގޮއްވާލި އަދުހަމް އަހުމަދު ރަޝާދުގެ މައްޗަށް އެކަންޏެވެ. އޭނާ ކުށަށް އިއުތިރާފުވެފައިވާތީ ހުކުމްކޮށްފައިވަނީ 23 އަހަރަށް ޖަލަށްލުމަށެވެ.
