ކުރިއަރު މެދުވެރިކޮށް ރާއްޖެ އެތެރެކުރަން އުޅުމނު 1.363 ކިލޯގެ މަސްތުވާތަކެތި ކަސްޓަމްސްއިން އަތުލައިގެންފިއެވެ.
ކަސްޓަމްސްއިން ދެންމެ ވިދާޅުވީ، މިމަސްތުވާތަކެތި އަތުލައިގެންފައިވަނީ ކުރިއަރ މެދުވެރިކޮށް ރާއްޖެ ގެނެސްފައިވާ ޕާރުސަލުތައް ބަލައިފާސްކުރުމުގެ ތެރޭގައި ޝައްކުކުރެވޭ ޒާތުގެ ބާވަތެއް ހުރުމުން އިތުރަށް ބަލައި ފާސްކުރުމުގެ ތެރޭގައި ކަމަށެވެ.
ކަސްޓަމްސް އިން އިތުރަށް ވިދާޅުވިގޮތުގައި، 2022 އެޕްރީލް 28 ވަނަ ދުވަހު ވައިގެ މަގުން އެތެރެކޮށްފައިވާ ޕާރުސަލެއް ބަލާ ފާސްކުރުމުގެ ތެރޭގައި މަސްތުވާތަކެތި ކަމަށް ޝައްކުކުރެވޭ ބާވަތެއް ފެނިފައިވާއިރު، ފުރަތަަމަ މަރުޚަލާގައި ކަސްޓަމްސްއިން އެތަކެތި ތަހުލީލުކުރިއިރު މަސްތުވާތަކެތީގެ ބާވަތެއް ކަމަށްވާ މެތްއެމްފަޓަމައިން އަށް ޕޮޒިޓިވްވެފައިވާ ކަމަށެވެ.
މިމައްސަލައިގައި އަތުލައިގަނެވުނު މަސްތުވާތަކެތީގެ ބަރުދަނުގައި ޖުމްލަ 1.363 ކިލޯ ހުރިއިރު މިތަކެތީގެ މަގުމަތީ އަގު ފަސް ލައްކަ ރުފިޔާއަށް އަރާ ކަމަށްވެސް ކަސްޓަމްސް އިން ވިދާޅުވިއެވެ.
އަދި މިމައްސަލައިގައި އަތުލައިގެންފައިވާ މަސްތުވާތަކެތި މިހާރު މޯލްޑިވްސް ޕޮލިސް އާއި ހަވާލުކޮށްފައިވާ ކަމަށް ވެސް ކަސްޓަމްސްއިން ވިދާޅުވިއެވެ.
