ޕްރިމިއާ ލީގުގައި 1-1 ގެ ނަތީޖާއަކުން ޓޮޓެންހަމް ހޮޓްސްޕާ އަތުން އެއްވަރުވެ، ލީގު ރޭހުގައި ލިވަޕޫލްއަށް ހާސްކަމާ ކުރިމަތިލާން ޖެހިއްޖެއެވެ.
ފުރަތަމަ ހާފް ދެޓީމު އެއްވަރުވެގެން ނިމިފައިވާއިރު، ދެވަނަ ހާފް ފެށިގެން ދެޓީމުން ވަނީ ކުޅުން ރަނގަޅުކޮށްފައެވެ. އެގޮތުން ލަނޑު ޖެހުމަށް ދެޓީމުންވެސް ދިޔައީ ފުރުސަތުތައް ތަނަވަސް ކުރަމުންނެވެ.
މި މެޗުގައި ފުރަތަމަ ލަނޑު ޖަހާ ލީޑު ނެގީ ޓޮޓެންހަމް އިންނެވެ. މި ލަނޑު ކައުންޓާ އެޓޭކެއްގައި އެޓީމަށް ކާމިޔާބުކޮށްދީފައިވަނީ ސޮންއެވެ. މި ލަނޑާއެކު ލިވަޕޫލްއިން ވަނީ އެޓީމުގެ އެޓޭކްތައް އިތުރަށް ވަރުގަދަކޮށް، ހަމަލާތައް ގިނަކޮށްފައެވެ.
މިގޮތުން ލިވަޕޫލްއިން މެޗުގެ ނަތީޖާ ހަމަހަމަ ކޮށްފައިވަނީ 74 ވަނަ މިނެޓުގައެވެ. މި ލަނޑު ތިއާގޯ އަލަކަންޓާރާގެ އެހީތެރިކަމާއެކު ކާމިޔާބުކޮށްފައިވަނީ ޑިއާޒްއެވެ.
މި ނަތީޖާއާއެކު ލިވަޕޫލް އޮތީ ކުޅުނު 35 މެޗުން ލިބުނު 83 ޕޮއިންޓާއެކު ޕޮއިންޓް ތާވަލުގެ އެއްވަނައިގައެވެ. ނަމަވެސް މާދަމާ ރޭ ސިޓީ އަދި ނިއުކާސަލް ޔުނައިޓެޑް ބައްދަލުކުރާ މެޗުން ސިޓީ ޕޮއިންޓެއް ހޯދިޔަސް އެޓީމަށް ޕޮއިންޓް ތާވަލުގެ އެއްވަނަ ލިބޭނެއެވެ. ސިޓީ އޮތީ ކުޅުނު 34 މެޗުން ލިބުނު 83 ޕޮއިންޓާއެކު ލަނޑުގެ ތަފާތުން ދެވަނައިގައެވެ. ޓޮޓެންހަމް އޮތީ ކުޅުނު 35 މެޗުން ލިބުނު 62 ޕޮއިންޓާއެކު ޕޮއިންޓް ތާވަލުގެ ފަސް ވަނައިގައެވެ.
