ހަމަނުޖެހުންތައް ބޮޑުވުމާ އެކު ސްރީ ލަންކާގެ ބޮޑުވަޒީރު މަހިންދަ ރާޖަޕަކްސަ އިސްތިއުފާ ދެއްވައިފި އެވެ.
ލަންކާގެ މީޑިއާތަކުން ރިޕޯޓް ކޮށްފައިވާ ގޮތުގައި، އުމުރުން 76 އަހަރުގެ ބޮޑު ވަޒީރު މަހިންދްރަ ރާޖަޕަކްސާ ވަނީ މަގާމުން އިސްތިއުފާ ދެއްވި ކަމުގެ ލިޔުން ލަންކާގެ ރައީސް ގޮޓަބަޔާ ރާޖަޕަކްސާއަށް މިއަދު ފޮނުއްވާފައެވެ.
ސްރީލަންކާއަށް ދިމާވެފައިވާ އިގްތިސާދީ ހީނަރުކަމާއި ގުޅިގެން އެގަމުގެ ގިނަ އަދަދެއްގެ ރައްޔިތުން އެއްވެ، ބޮޑުވަޒީރާއި ރައީސްގެ އިސްތިއުފާއަށް ގޮވައި މުޒާހަރާ ކުރާތާ އެތައް ދުވަހެއް ވެސް ވެފައިވާއިރު، މީގެ ކުރިން ބޮޑު ވަޒީރު ވިދާޅުވަމުން އައީ އިސްތިއުފާ ނުދެއްވާނެކަމަށެވެ. އަދި ބޮޑުވަޒީރު ގެ މި ނިންމެވުމަށް އެއްބާރުލުން ދިނުމުގެ ގޮތުން އެމަނިކުފާނަށް ތާއީދުކުރާ ރައްޔިތުން ވަނީ އިސްތިއުފާ ނުދެއްވުމަށް އެދި ގޮވައި އަޑު އުފުލާފައެވެ.
މިގޮތުން އިސްތިއުފާ އަށް ގޮވައި މުޒާހަރާ ކުރި ރައްޔިތުންނާއި، ސަރުކާރަށް ތާއީދު ކޮށް މުޒާހަރާ ކުރި ރައްޔިތުންގެ މެދުގައި ވަނީ ހަމަނުޖެހުންތަކެއްވެސް ހިނގާފައެވެ.
ބޮޑު ވަޒީރު އިސްތިއުފާ ދެއްވާފައި މިވަނީ، މި ބޮޑު ހަމަނުޖެހުންތަކާއި ގުޅިގެން “ލަންކާ އަށްޓަކައި ކޮންމެ ފަދަ ގުރުބާނީއެއް ވެސް ވާން ތައްޔާރަށް ހުންނެވި” ކަމަށް އެމަނިކުފާނުގެ ސަޕޯޓަރުންނަށް މިއަދު ވިދާޅުވެފައިވަނިކޮށް ކަންވެސް ފާހަގަކުރެވެއެވެ.
