ހުޅުމާލޭގެ ދެވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓްގެ ދެ ޓަވަރެއްގައި ސީސީޓީވީ ކެމެރާ ހަރުކޮށް އޮޕަރޭޝަނަށް ގެނެސްފި އެވެ.
ހިޔާ ފްލެޓްތަށް މެނޭޖްކުރާ ހައުސިންގ ޑިވެލޮޕްމެންޓް ކޯޕަރޭޝަނުން މިއަދު ބުނީ ހިޔާ ސަރަހައްދުގެ ސަލާމަތާއި ރައްކާތެރިކަން އިތުރަށް ހަރުދަނާ ކުރުމުގެ މަގްސަދުގައި ކުރިޔަށް ގެންދާ ސީސީޓީވީ ކެމެރާ ޕްރޮޖެކްޓްގެ ތެރެއިން ދެ ޓަވަރެއްގައި ކެމެރާ ހަރުކޮށް އޮޕަރޭޝަނަށް ގެނެސްފައިވާ ކަމަށެވެ.
މިގޮތުން ކެމެރާ ހަރުކޮށް އޮޕަރޭޝަނަށް ގެނެސްފައިވަނީ ހިޔާ ޓަވަރު 13 އަދި 14 ގައި އެވެ.
5000 މީހުންގެ އާބާދީއެއް މިހާރުވެސް ދިރިއުޅެމުން އަންނަ ހިޔާ ފްލެޓް ސަރަހައްދުގައި އެޗްޑީސީން ސީސީޓީވީ ކެމެރާ ހަރުކުރަން ފަށާފައިވާއިރު އެ ސަރަހައްދުގައި އެކި ބާވަތްތަކުގެ ކުށްތައް ކުރުން ވަނީ ގިނަވެފައެވެ.
