ސްރީލަންކާގައި ދިރިއުޅޭ ދިވެހިން ސަމާލުވާން އެގައުމުގައި ހުންނަ ރާއްޖޭގެ ހައިކޮމިޝަނުން އިލްތިމާސްކޮށްފި އެވެ.
ލަންކާގައި ހުންނަ ރާއްޖޭގެ ހައިކޮމިޝަނުން ބުނީ މުޅި ލަންކާގައި ހިމެނޭ ގޮތަށް މިވަގުތު އޮތީ ކާފިއު އިއުލާންކޮށްފައި ކަމަށާއި އެގޮތުން ލަންކާގައި ދިރިއުޅޭ އަދި ލަންކާ އަށް ދަތުރުކުރާ ހުރިހާ ދިވެހިން ވެސް ލަންކާގެ ކަމާބެހޭ ފަރާތްތަކުން ދެއްވާ އިރުޝާދުތަކަށް ސަމާލުވާން އިލްތިމާސްކުރާ ކަމަށެވެ.
އިމަޖެންސީ ޙާލަތެއް ދިމާވެއްޖެނަމަ، ހައިކޮމިޝަނުގެ ހޮޓްލައިން ނަންބަރު 0768816666 އަށް ގުޅުމަށް ވަނީ އެދިފަ އެވެ.
ލަންކާގެ އެކި ސަރަހައްދުތަކުގައި މުޒާހަރާތައް ކުރަމުން އަންނައިރު، މުޒާހަރާތައް މިއަދު ހޫނުވީ ލަންކާގެ ރައީސް އޮފީސް ބޭރުގައި ޓެންޓު ޖަހައިގެން ތިބި މުޒާހަރާގެ ބައިވެރިންނަށް ރައީސް ގޮޓާބަޔާ ރާޖަޕަކްސަގެ ސަޕޯޓަރުން ހަމަލާދިން ހިސާބުންނެވެ. އެގޮތުން އެ ފަރާތްތަކަށް ހަމަލާދިނުމަށް ދަގަނޑު ހޮޅިބުރި އާއި ލަޓިބުރި ބޭނުންކޮށްފައިވާ ކަމަށް ރިޕޯޓުތައް ބުނެ އެވެ.
ދެ ފަރާތުގެ ދެމެދުގައި ހިނގި ހަމަނުޖެހުންތަކުގައި މިހާތަނަށް ދެ މީހަކު މަރުވެފައިވާއިރު 130 އަށް ވުރެ ގިނަ މީހުންނަށް ވަނީ އެކިވަރުގެ އަނިޔާތައް ވެފަ އެވެ.
