ސްރީލަންކާގެ ބޮޑުވަޒީރުކަމުން މިއަދު އިސްތިއުފާ ދެއްވި މަހިންދަ ރާޖަޕަކްސަގެ ގެއެއްގައި އަލިފާން ރޯކޮށްލައިފި އެވެ.
ލަންކާގެ ސަރުކާރާއި ދެކޮޅަށް ކުރަމުންދާ މުޒާހަރާތައް މިއަދު ވަރަށް ބޮޑަށް ހޫނުވެފައިވާއިރު މުޒާހަރާގެ ބައިވެރިން މިރޭ ވަނީ ކުރުނެގަލާ ސިޓީގައި ހުންނަ ރާޖަޕަކްސަގެ ގެއެއްގައި އަލިފާން ރޯކޮށްލާފަ އެވެ. އަދި މުޒާހަރާގެ ބައިވެރިން ވަނީ ހަމްބަންޓޯޓާގައި ހުންނަ ރާޖަޕަކްސަގެ އާއިލީ ގެއެއްގައި ވެސް ހުޅުޖަހާފަ އެވެ.
މުޒާހަރާގެ ބައިވެރިން އަންނަނީ ލަންކާގެ ވެރިކަން ކުރާ ޕާޓީ ކަމަށްވާ، ޕޮޑުޖުނާ ޕެރަމުނާ (އެސްއެލްޕީޕީ) އަށް ނިސްބަތްވާ ގާނޫނު ހަދާ މަޖިލީހުގެ މެމްބަރުންގެ ގެތަކުގައި ވެސް ރޯކުރަމުންނެވެ. އަދި އެސްއެލްޕީޕީގެ ބައެއް އޮފީސްތަކުގެ އިތުރުން މެމްބަރުންގެ ބައެއް މުދާތަކުގައި ވެސް މުޒާހަރާގެ ބައިވެރިން ހުޅުޖަހާފައިވާ ކަމަށް ރިޕޯޓުތައް ބުނެ އެވެ.
ލަންކާގެ އެކި ސަރަހައްދުތަކުގައި މުޒާހަރާތައް ކުރަމުން އަންނައިރު، މުޒާހަރާތައް ކޮންޓްރޯލް ކުރަން ފުލުހުން އަންނަނީ ކަރުނަ ގޭސް ބޭނުން ކުރަމުންނެވެ. ނަމަވެސް މުޒާހަރާތަކަށް ހުއްޓުމެއް އައިސްފައި ނުވާ ކަމަށްވެސް ލަންކާގެ މީޑިއާ ރިޕޯޓުތައް ބުނެ އެވެ.
މުޒާހަރާތައް ހޫނުވީ ލަންކާގެ ރައީސް އޮފީސް ބޭރުގައި ޓެންޓު ޖަހައިގެން ތިބި މުޒާހަރާގެ ބައިވެރިންނަށް ރައީސް ގޮޓާބަޔާ ރާޖަޕަކްސަގެ ސަޕޯޓަރުން ހަމަލާދިން ހިސާބުންނެވެ. އެގޮތުން އެ ފަރާތްތަކަށް ހަމަލާދިނުމަށް ދަގަނޑު ހޮޅިބުރި އާއި ލަޓިބުރި ބޭނުންކޮށްފައިވާ ކަމަށް ރިޕޯޓުތައް ބުނެ އެވެ.
ދެ ފަރާތުގެ ދެމެދުގައި ހިނގި ހަމަނުޖެހުންތަކުގައި މިހާތަނަށް ދެ މީހަކު މަރުވެފައިވާއިރު 130 އަށް ވުރެ ގިނަ މީހުންނަށް ވަނީ އެކިވަރުގެ އަނިޔާތައް ވެފަ އެވެ.
ލަންކާގައި ހަމަނުޖެހުން ބޮޑުވެ ވެރިރަށް ކޮލަމްބޯގައި ކާފިއު އިއުލާންކޮށްފައިވާއިރު، ލަންކާގައި މިވަގުތު އޮތީ ކުއްލި ނުރައްކަލުގެ ހާލަތު ވެސް އިއުލާންކޮށްފަ އެވެ.
