ސްރީ ލަންކާގެ ބޮޑުވަޒީރު ކަމަށް ޔުނައިޓެޑް ނޭޝަނަލް ޕާޓީ (ޔޫއެންޕީ)ގެ ލީޑަރު ރަނިލް ވިކްރަމަސިންހަ އައްޔަންކޮށްފި އެވެ.
ރަނިލް ބޮޑުވަޒީރު ކަމުގެ މަގާމަށް އައީ ބޮޑުވަޒީރުކަމުން އިސްތިއުފާ ދެއްވި މަހިންދަ ރާޖަޕަކްސައާއި ރައީސް ގޮތަބަޔާ ރާޖަޕަކްސަގެ ސްރީ ލަންކާ ޕޮޑުޖަނާ ޕެރެމުނާ (އެސްއެލްޕީޕީ)ގެ ތާއީދާއެކު އެވެ.
ރަނިލް ވަނީ ޕާލަމެންޓުގައި މީގެ ކުރިން އަށް ދައުރު ފުރިހަމަ ކުރައްވައިފަ އެވެ. އަދި 1994 ވަނަ އަހަރުން ފެށިގެން ޔޫއެންޕީގެ ލީޑަރުކަން ކުރައްވަމުން ގެންދަވާ އިރު، މީގެ ކުރީން ހަ ފަހަރެއްގެ މަތިން އޭނާ ބޮޑުވަޒީރުކަން ކުރެއްވި އެވެ. ރަނިލްއަށް އެންމެ ފަހުން މަގާމު ލިބިވަޑައިގަތީ 2018 ވަނަ އަހަރު އެވެ.
ރައީސް ގޮޓާބަޔަ ރާޖަޕަކްސަގެ ބޭބޭފުޅު މަހިންދަ ބޮޑުވަޒީރުކަމުގެ މަގާމުން އިސްތިއުފާ ދެއްވީ މިދިޔަ ހޯމަ ދުވަހު އެވެ. އޭގެ ފަހުން ލަންކާގައި ބޮޑެތި ހަމަނުޖެހުންތައް ހިނގައި ސިޔާސީ ބޭފުޅުންނާއި އާންމުންގެ މުދަލުގައި ހުޅުޖަހައި ބޮޑެތި ގެއްލުންތައް ވަނީ ދީފަ އެވެ.
