ހަނިމާދޫ ކައުންސިލްގެ 4 ވަނަ ދައުރުގެ ކާމިޔާބު 1 އަހަރު ނިންމާލާފައިވަނީ ކައުންސިލާއި އ.ތ.މ ކޮމިޓީ އަދި އިދާރީ މުވައްޒަފުންގެ ފަރާތުން ކުރިއަށްގެންދިޔަ ހާއްސަ ގަސްއިންދުމުގެ ހަރަކާތަކުންނެވެ.
މިގޮތުން ހަނިމާދޫ އެގްރިކަލްޗަރަލް ސެންޓަރުގެ އެހީއާއިއެކު ހަނިމާދޫގެ މަގުތަކުގައި ސިލްސިލާކޮށް ގަސްއިންދުމުގެ މި ޕްރޮގްރާމް އިފްތިތާހު ކޮށްދެއްވާފައިވަނީ ހަނިމާދޫ އަންހެނުންގެ ތަރަށްގީއަށް މަސައްކަތްކުރާ ކޮމިޓީގެ ރައީސާ ޢާއިޝަތު ޝިއުނީއެވެ.
މި ޕްރޮގްރާމް ކުރިއަށް ގެންގޮސްފައިވަނީ 17 މެއި 2022 ވީ އަންގާރަ ދުވަހުގެ ހަވީރުއެވެ. މި ހަރަކާތުގައި ތާރުއެޅި މަގުތަކުގައި ގިނަ އަދަދެއްގެ ގަސް ވަނީ އިންދާފައެވެ. އަދި މީގެ އިތުރުން މި ހަރަކާތުގެ ދަށުން ކައުންސިލުން ވަނީ ރަށުގެ އެކިއެކި މުއައްސަސާތައް ހިމެނޭ މަގުތަކުގައި ގަސް އިންދުމަށް އެ އިދާރާތަކަށް ގަސް ހަދިޔާކޮށްފައެވެ.
ހަނިމާދޫ ފެހިކުރުމުގެ މަގުސަދުގައި ކައުންސިލުން ފަށާފައިވާ މި މަސައްކަތައް ބޭނުންވާ ގަސް މުޑުވަށްކޮށް ކައުންސިލަށް ފޯރުވައިދެނީ މިނިސްޓްރީ އޮފް ފިޝަރީޒް އެންޑު އެގްރިކަލްޗަރ ގެ ފަރާތުން ހަނިމާދޫ އެގްރިކަލްޗަރ ސެންޓަރުންނެވެ.
މި ޕްރޮގްރާމުގައި ހަނިމާދޫން ނެތެމުންދާ ބާވަތުގެ ގަސްތައް ފާހަގަކޮށް އެފަދަ ގަސްތައް އާލާކުރުމުގެ މަސައްކަތް ކުރުމަށް ހަނިމާދޫ ކައުންސިލާއި ހަނިމާދޫ އެގްރިކަލްޗަރ އިން މަސައްކަތްކުރާނެކަމުގައި ހަނިމާދޫކައުންސިލުން ބުނެއެވެ. އަދި މީގެ އިތުރުން ކާބޯތަކެތީގެ ބާވަތްތައް ހިމެނޭ ގަސްތައް ރަށުގެ އެކި ސަރަހައްދުގައި އާލާކުރުމުގެ މަސައްކަތް ކުރުމަށް ހަމަޖެހިފައިވެއެވެ.
