އުމުރުން ހަތަރު އަހަރުގެ ދަރިފުޅު މަރާލިކަމުގެ ކުށް ށ. ފުނަދޫ/ ދިނަށަ އާމިނަތު ޝާހިދާގެ މައްޗަށް ސާބިތުވާ ކަމަށް ކުރިމިނަލް ކޯޓުން ކަނޑައަޅައިފިއެވެ.
މިއަދު ކްރިމިނަލް ކޯޓުގައި ކުރިއަށް ދިޔަ އަޑުއެހުމުގައި، ޝާހިދާގެ މައްޗަށް އުފުލާފައިވާ އެނގިހުރެ މީހަކު މެރުމުގެ ކުށް އެއްވެސް ޝައްކެއް ނެތް މިންވަރަށް ސާބިތުވާކަމަށް ކްރިމިނަލް ކޯޓުން ވަނީ ކަނޑައަޅާފައެވެ.
އެއާއެކު، ދެން އޮންނަ އަޑުއެހުމެއްގައި މި މައްސަލައިގައި ހިމެނޭ ވާރިސުންގެ ބަސް ނެގުމާއި، އަދަބާއި ގުޅޭގޮތުން ވާހަކަ ދައްކާނެ އެވެ. އޭގެ ފަހުން މި މައްސަލައިގެ ހުކުމް އިއްވާނެ އެވެ.
ކްރިމިނަލް ކޯޓުގައި މި މައްސަލަ ބައްލަވަނީ އެ ކޯޓުގެ އިސްގާޒީ އަހުމަދު ޝަކީލެވެ.
ޝާހިދާ އޭނާގެ ދަރިފުޅު މަރާލާފައިވަނީ 2016 ވަނަ އަހަރުގެ ފެބްރުއަރީ މަހުގައެވެ. އެގޮތުން އެ ކުއްޖާ މަރާލާފައިވަނީ އަތާއި، ކޮނޑުހުޅަށް ތޫނު އެއްޗަކުން ހަމަލާދީ އެވެ.
މިހާދިސާގެ ރިޕޯޓް ފުލުހުންނަށް ލިބިފައިވަނީ ޙާދިސާ ހިނގި ރޭ ފަތިހު 05:40 ހާއިރު ކަމަށް ފުލުހުން ބުނެއެވެ.
