ފިންލެންޑްގެ ވާޓްސިލާ ކުންފުނިން ސްޓެލްކޯއާ އެކުގައި މަސައްކަތް ކުރާތާ 30 އަހަރުފުރޭ ޒަމާންވީ ގުޅުން ފާހާގަކޮށް ވާޓްސިލާއިން ސްޓެލްކޯއަށް ތައުރީފް ކޮށްފިއެވެ.
ސްޓެލްކޯއާއި ދުނިޔޭގެ އެންމެ ވަރުގަދަ ޖަނަރޭޓަރު ސެޓް އުފައްދާ ކުންފުނިތަކުގެ ތެރޭގައި ހިމެނޭ ފިންލެންޑްގެ ޓެކްނޮލޮޖީ ގްރޫޕް، ވާޓްސިލާ ކުންފުންޏާ އެކުގައި މަސައްކަތް ކުރާތާ މިއަހަރަށް 30 ވެފައެވެ.
ރާއްޖެއަށް ފުރަތަމަ ވާޓްސިލާގެ ޖަނަރޭޓަރު ސެޓެއް ގެނައީ 1990 ވަނަ އަހަރެވެ. އާންމުގޮތެއްގައި ޑީސަލް ޖަނަރޭޓަރެއްގެ އުމުރަކީ 25 އަހަރު ނަމަވެސް، މާލޭ އިންޖީނުގެއަށް ގެނައި އެ ޖަނަރޭޓަރު ސެޓްތައް މިއަދާ ހަމައަށްވެސް ބޭނުންކުރަމުން އަންނަ ކަމަށް އެކުންފުނިން ބުނެ އެވެ. އެކަން ފާހަގަކޮށް ވާޓްސިލާއިން ވަނީ އެ ޖަނަރޭޓަރުތަކުގެ މެއިންޓަނެންސް ބެލެހެއްޓުމުގައި ސްޓެލްކޯގެ ގާބިލް އަދި ތަޖުރިބާކާރު އިންޖިނިއަރުންގެ މަސައްކަތް ފާހަގަކޮށް، އެ މަސައްކަތަށް ތައުރީފްކޮށްފައެވެ.
ވާޓްސިލާއިން ރާއްޖެއަށް 1990ގައި ފޮނުވި ދެ ޖަނަރޭޓަރު ސެޓުގެ އިތުރުން މާލޭ އިންޖީނުގެއަށް އިތުރު ހަ ޖަނަރޭޓަރު ސެޓެއް ގެނެސްފައިވެއެވެ. އަދި ހުޅުމާލޭގައި އަޅާފައިވާ 50 މެގަވޮޓް އިންޖީނުގޭގައި ބޭނުން ކުރަމުންދަނީވެސް ވާޓްސިލާގެ ހަ ޖަނަރޭޓަރު ސެޓެވެ. އެއާއެކު ވާޓްސިލާގެ އިންޖީނުތަކުގެ ކެޕޭސިޓީ ޖުމްލަ 100މެގަވޮޓަށް ވަނީ އަރާފައެވެ.
އޭގެ އިތުރުން ވާޓްސިލާގެ އެންމެފަހުގެ އުފެއްދުން ކަމަށްވާ ސްޓޭޓް އޮފް ދަ އާޓް އިންޖިން ކޮންޓްރޯލް އެންޑް މޮނިޓަރިން ސިސްޓަމް މިހާރު ސްޓެލްކޯގައި ވަނީ ބޭނުން ކުރަން ފަށާފައެެވެ. މިއީ ޖަނަރޭޓަރު ސެޓްތަކުން ކަރަންޓު އުފައްދަން ބޭނުންވާ ތެލުގެ މިންވަރު ކުޑަކޮށް، ވައި ތަޣައްޔަރުވާ އިންސައްތަ މަދުކުރުމަށް އުފައްދާފައިވާ ސިސްޓަމެކެވެ.
ސްޓެލްކޯގެ މެނޭޖިން ޑިރެކްޓަރު އަހުމަދު ޝަރީފް ވިދާޅުވީ ރާއްޖެފަދަ ޖަޒީރާ ރަށްތަކެއްގެ މައްޗަށް ބިނާވެގެންވާ އަދި ފަތުރުވެރިކަމުގެ ސިނާއަތަށް ބަރޯސާވާ ގައުމަކަށް ކަރަންޓު ފޯރުކޮށްދޭންޖެހޭ ނިޒާމު ތަފާތުވިކަމުގައި ވީނަމަވެސް ކަރަންޓުގެ ހިދުމަތް އެންމެ ފުރިހަމައަށް ފޯރުކޮށްދެވޭ ކަމަށެވެ. އަދި އެއީ ވާޓްސިލާ ކުންފުނީގެ ޓެކްނިކަލް ގާބިލުކަމާއި އެފަރާތުން ދޭ ކަސްޓަމާ ސާވިސްގެ ފުރިހަމަކަމުން ކަމަށް ޝަރީފް ވަނީ ފާހަަގަކުރައްވާފައެވެ.
