ނ. ވެލިދޫ މަގުތައް ޒަމާނީ ފެންވަރަކަށް ހެދުމަށްޓަކައި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އަށް ހަވާލު ކޮށްފައިވާ މަސައްކަތް ރަސްމީކޮށް މިއަދު ފަށައިފިއެވެ.
މި މަސައްކަތް ރަސްމީކޮށް ފެށުމަށްޓަކައި އެރަށުގައި ހާއްސަ ރަސްމިއްޔާތެއް ވަނީ ބާއްވައިފައެވެ. އެ ރަސްމިއްޔާތުގައި ވެލިދޫ ދާއިރާގެ މެންބަރާއި އާރްޑީސީގެ މެނޭޖިން ޑިރެކްޓަރު މޫސާ އަލީ މަނިކު (މޫކޭ) ވަނީ ބައިވެރިވެވަޑައިގެންފައެވެ.
މި މަޝްރޫއުގެ ދަށުން ފަސް ކިލޯމީޓަރުގެ މަގުގައި ތާރުއަޅާއިރު މަގުތަކުގައި ފެންހިންދާ ނިޒާމް ގާއިމްކުރާނެއެވެ. އަދި މަގުތަކުގައި މަގުބައްތި ވެސް ޖެހުން ވެސް މި މަޝްރޫއުގެ ދަށުން ކުރިޔަށް ގެންދިއުމަށް ވަނީ ނިންމައިފައެވެ.
ވެލިދޫ މަގުތަކުގައި ތާރު އަޅާ ޒަމާނީ ފެންވަރަށް ތަރައްޤީކުރުމަށް އާރް.ޑީ.ސީއާއެކު ޕްލޭނިންގ މިނިސްޓްރީން އެއްބަސްވުމުގައި ސޮއިކޮށްފައިވަނީ މިދިޔަ އަހަރުގެ ނޮވެމްބަރު މަހުގެ 15 ގައެވެ. މި މަސައްކަތް ފުރިހަމަކުރުމަށް އެކުންފުންޏަށް ދީފައިވަނީ 450 ދުވަހުގެ މުއްދަތެކެވެ. ވެލިދޫ މަގު ހެދުމުގެ މަޝްރޫޢަށް ގާތްގަނޑަކަށް 88.5 މިލިއަނަށްވުރެ ގިނަ ރުފިޔާ ޚަރަދުވާނެކަމަށް ޕްލޭނިންގ މިނިސްޓްރީން ވިދާޅުވެފައިވެއެވެ.
