ހަނިމާދޫގައި ބޮޑު އީދު ފާހަގަކުރަން 70،000 ރުފިޔާ ހަރަދު ކުރަން ހަނިމާދޫ ކައުންސިލުގެ 4 ވަނަ ދައުރުގެ 49 ވަނަ އާއްމު ބައްދަލުވުމުގައި މަޝްވަރާކޮށްފިއެވެ.
މިއަދު ޖަލުސާގައި މި ހުށައެޅުން ހުށައެޅީ ހަނިމާދޫ ކައުންސިލްގެ އަންހެން މެންބަރު ނާޒިޔާ ހަސަން އެވެ.
“އަޅުގަނޑު މި ހުށައަޅަނީ އަލްހާ އިދު ރަށު ފެންވަރުގައި ފާހަގަކުރުމަށް 70،000 ރުފިޔާ ފާސްކުރުމަށް”
މި ހުށައެޅުން ހުށައެޅުމުން އިދާރާއިން ވަނީ އިދާރާގެ ލަފާ އަރުވާފައެވެ. އެ ލަފާގައި ވަގުތީ އެސްޖީ މުހައްމަދު ހަސަން ވިދާޅުވީ ދުވަސްތައް ފާހަގަކުރުމަށް 2022 ވަނަ އަހަރު ބަޖެޓްް ގައި ހިމެނެނީ އެއްލައްކަ ރުފިޔާކަމަށާ މިހާ ބޮޑު ހަރަދެއް ކުރަން ފާސްކުރާއިރު ފުރަތަމަ ނިންމަންވީ ކުރާނެ ކަންތައްތައް ކަމަށެވެ.
އެ ލަފާ އެރުވުމާއެކު ބޮޑު އީދު ކުލަގަދަކޮށް ފާހަގަކުރަން މިއަދުގެ ޖަލުސާގައި ވަނީ ފާސް ކޮށްފައެވެ. މިގޮތަށް ފާސްވީ ޖަލުސާގެ އަގުލަބިއްޔަތުންނެވެ. މިއަދު ޖަލުސާގައި ކައުންސިލްގެ ރައީސް ބައިވެރިވެފައި ނުވެއެވެ.
އަދި ކުރާނެ ކަންތައް ކަނޑައެޅުމަށްފަހު ބަޖެޓު އަދަދު ކަނޑައެޅުމަށް ވަނީ މިއަދުގެ ޖަލުސާގައި ނިންމާފައެވެ.
