9 ކުއްޖަކު ނ. މަނަދޫ އަމާން ވެއްޓަށް ބަދަލުކޮށްފި އެވެ.
ޖެންޑަރ މިނިސްޓްރީން ހާމަކޮށްފައިވަނީ، އިޖުތިމާޢީ އަދި ޢާއިލީ ގުޅުމުގެ ތެރެއިން ބޮޑުވުމުގެ ފުރުޞަތު ފަހިކޮށްދިނުމުގެ ގޮތުން 9 ކުއްޖަކު ނ. މަނަދޫގައި ގާއިމް ކޮށްފައިވާ “އަމާން ވެށި”މަރުކަޒަށް މިމަހުގެ 24 ވަނަ ދުވަހު ބަދަލުކޮށްފައިވާ ކަމަށެވެ.
ޖެންޑަރ މިނިސްޓްރީން ބުނެފައިވަނީ، ސަރުކާރުގެ އަމާޒަކީ ކޮންމެ ކުއްޖަކީވެސް އާއިލީ މާހައުލުގެ ތެރެއިން ލޯތްބާއި އަޅައިލުމާއެކު ބޮޑުވާ ކުއްޖަކަށް ހެދުން ކަމަށެވެ. ސަރުކާރުގެ ބެލުމުގެ ދަށުގައިވެސް ގިނަ ކުދިންތަކެއް ތިބި އިރު، އެ ކުދިންނަށްވެސް މުޖުތަމައުގެ ތެރޭގައި ބޮޑުވުމުގެ ފުރުސަތު ތަނަވަސްކޮށްދިނުމުގެ ގޮތުން ސަރުކާރުން ގިނަ މަސައްކަތްތަކެއް ކުރަމުން ގެންދާ ކަމަށް އެ މިނިސްޓްރީން ވަނީ ބުނެފައެވެ.
ސަރުކާރުގެ ބެލުމުގެ ދަށުގައި ތިބިކުދިންނަށް މުޖުތަމައުގެ ތެރޭގައި ބޮޑުވުމުގެ ފުރުސަތު ފަހި ކޮށްދިނުމުގެ ގޮތުން ރާއްޖޭގެ އިތުރު ސަރަހައްދު ތަކެއްގައި އަމާން ވެށިތައް ތަރައްޤީކުރުމުގެ މަސައްކަތް ސަރުކާރުން ގެންދަނީ ކުރަމުންނެވެ.
މީގެ ކުރިން 2020 ވަނަ އަހަރުގެ ޑިސެންބަރު މަހުގެ 24 ވަނަ ދުވަހު 17 ކުއްޖަކު ވަނީ ބ. އޭދަފުށި އަމާން ވެށްޓަށް ބަދަލުކޮށްފައެވެ. އަދި ށ. ފުނަދޫ، އަމާންވެށްޔަށް 16 ކުއްޖަކު ބަދަލުކޮށްފައި ވަނީ މިދިޔަ އަހަރުގެ ޖެނުއަރީ 6 ވަނަ ދުވަހުއެވެ. އަދި ފުވައްމުލަކު އަމާންވެއްޓަށް 11 ކުދިން ބަދަލުކޮށްފައިވަނީ މިދިޔަ އަހަރުގެ ޖެނުއަރީ 24 ވަނަ ދުވަހުއެވެ.
