މިވަގުތަކީ ސަރުކާރުން ކުރިއަށްގެންދާ މަޝްރޫތައް މަޑުޖައްސާލަންޖެހޭ ވަގުތެއް ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ހައުސިން މިނިސްޓަރު މުހައްމަދު އަސްލަމްއާ ސުވާލު ކުރުމަށް މެމްބަރުންނަށް ލިބުނު ވަގުތުގައި މެމްބަރަކު ކުރި ސުވާލާ ގުޅިގެން ރައީސް ނަޝީދު ވިދާޅުވީ، ރާއްޖޭގެ މާލީ ހާލަތާއި ދުނިޔޭގެ ކަންކަމަަށް އަންނަ ބަދަލުތަކަށް ބަލާ މިއީ މަޝްރޫތައް މަޑުޖައްސާލަންޖެހޭ ވަގުތެއް ކަމަށެވެ.
ރައީސް ނަޝީދު ވިދާޅުވީ މިއީ ބާރަށް، ކޮންކްރީޓްގެ ޕްރޮޖެކްޓްތައް ހިންގާވީ ވަގުތު ނޫން ކަމަށާއި އަދި ޕްރޮޖެކްޓްތައް މަޑުޖައްސައިލުމުގެ ވާހަކަ ދައްކަން ދައްކަން މެމްބަރުންނާއި ސަރުކާރަށް ފަސޭހަނުވާނެކަން އެނގޭ ކަމަށެވެ. އެހެންނަމަވެސް އެމަނިކުފާނު އެވާހަކަ ވިދާޅުވާން ޖެހިވަޑައިގަންނަވާ ކަމަށް ވިދާޅުވިއެވެ.
“މިވަގުތު ރާއްޖޭގެ މާލިއްޔަތަށާ ދުނިޔޭގެ ކަންކަމަށް އަންނަ ބަދަލުތަކާ އަދި ދުނިޔޭގެ އިގުތިސާދަށް، ހާއްސަކޮށް ތެލުގެ އަގު 121 ރުފިޔާއަށް އިއްޔަ އަރައިފި. އަދި އަޅުގަނޑުމެންގެ އަވައްޓެރި ގައުމެއް އެ އުޅެނީ ވަރަށް ބޮޑަށް ދަރަނީގެ ދަތީގައި.” ރައީސް ނަޝީދު ވިދާޅުވިއެވެ.
ކޮވިޑް-19 އަށްފަހު ދުނިޔޭގެ އިގްތިސާދީ ހާލަތު ހަމައަކަށް ނޭޅިގެން އުޅޭއިރު، ރަޝިޔާ – ޔޫކްރެއިން ހަނގުރާމައާ ގުޅިގެން ވެސް ދުނިޔޭގެ އިގްތިސާދަށް އަދި ވަކިން ހާއްސަކޮށް ތެލުގެ އަގަށް ބޮޑެތި ބަދަލުތައް އާދެއެވެ.
